भांगरभूंय | प्रतिनिधी
मडगांव : मडगांव सिने लता वाठारांत एकाच नंबराच्यो दोन दुचाकी आशिल्ल्याची म्हायती येरादारी पुलिसांक मेळ्ळी. ते प्रमाण येरादारी पुलिसांनी दोनूय दुचाकी जप्त केल्यो. वाहन अॅपाचेर ह्या गाडयांच्या धनयांचें नांव येना. ताका लागून ह्यो बनावट आशिल्ल्याची शक्यताय आसा. हे विशीं मडगांव पुलीस गाडयांच्या धनयाचो सोद घेतात.
मजगतीं, मडगांव वाठारांत पालिका इमारतीच्या आशिकुशीकच्या वाठारांत पार्किंगचे सुवातेर रेंट अ बायक उब्यो करून दवरतात, अश्यो कागाळी आदीं सावन येतात. मात, हाचेर उपाय काडपाक पालिका प्रशासन आनी येरादारी पुलीस अपेशी थारतात.
मडगांव येरादारी पुलिसांक बुधवारा सांजेवेळार एका मनशाचो फोन आयलो. तांणी एकाच नंबराच्यो दोन रेंट अ बायक उब्यो आशिल्ल्याची म्हायती दिली. ते प्रमाण येरादारी पुलीस निरीक्षक संजय दळवी हांच्या मार्गदर्शना खाला धीरेंद्र देसाय हांणी सिने लता वाठारांत वचून पळोवणी केली. तेन्ना जीए- ०८- व्ही- ०९९१ अशी नंबर प्लेट आशिल्ल्यो दोन दुचाकी दिसल्यो. येरादारी पुलिसांनी वाहन अॅपार हो नंबर घालो. तेन्ना ह्या नंबराची कसलेच तरेची म्हायती अॅपाचेर नाशिल्ली. ताका लागून पुलिसांनी ह्यो दोनूय दुचाकी जप्त केल्यो. उपरांत हें प्रकरण फुडले कारवाये खातीर मडगांव पुलिसां कडेन दिलें. मडगांव पुलीस निरीक्षक तुळशीदास नायक हांणी हे विशीं दुचाकी धनयाचो सोद घेता अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
