भांगरभूंय | प्रतिनिधी
बंगळुरू, खबरां संस्था: विमानतळ ही खूब सुरक्षीत सुवात मानतात. विमानतळार शेंकड्यांनी सुरक्षा कर्मचारी नेमिल्ले आसात. हातूंत पुलीस आनी संरक्षण दळाच्या कर्मचार्यांचो आसपाव आसता. दरेकल्याक जायत्यो तपासण्यो करून भितर सोडटात. देखून विमानतळार खंयचेंय शस्त्र व्हरप शक्य ना. पूण बेंगळुरूच्या केम्पेगोडा आंतरराष्ट्रीय विमानतळार कुराडीच्या हल्ल्यांत एका तरणाट्याक मरण आयलें. हे घडणुकेक लागून विमानतळ वाठारांत भंय निर्माण जाल्या. मरण आयिल्ल्या तरणाट्याचें नांव रामकृष्ण अशें पुलिसांनी सांगलां. हो तरणाटो विमानतळार ट्रॉली ऑपरेटर म्हणून काम करतालो.
अनैतीक संबंधाच्या दुबावा वयल्यान हो खून जाल्ल्याचें तपासांतल्यान उक्ताडार आयलां. हे घडणुकेची म्हायती मेळटांच पुलीस विमानतळार दाखल जाल्यात. पुलिसांनी कूड पोस्टमार्टमा खातीर धाडल्या. आरोपी रमेश हाका घडणुके सुवाते वेल्यान अटक केल्या.
ईशान्य बंगळुरूच्या पुलीस उपअधीक्षकांच्या म्हणण्या प्रमाण, रमेश बेग अशें ह्या प्रकरणांतल्या आरोपीचें नांव जावन आसा. ताणें एक शस्त्र हाडिल्लें. तेंय पुरावो म्हणून जप्त केलां. तो बीएमटीसी बसींतल्यान विमानतळार दाखल जाल्लो. तो बसींत आशिल्ल्यान ताची तपासणी (स्कॅनींग) करूंक ना. बेगचें स्कॅनींग जावंक नाशिल्ल्यान तो शस्त्र घेवन विमानतळाचेर पावलो. उपरांत ताका कळ्ळें रामकृष्ण टर्मिनल १ च्या लेन १ च्या पार्कींगांतल्या शौचालया लागसारा आसा म्हणून. ताका लागून तो तें शस्त्र (कुराड) घेवन शौचालया लागसारा गेलो. थंय वचून रामकृष्णाचेर वार केले. तातूंत रामकृष्णाक जाग्यारूच मरण आयलें.
आरोपीन पुलिसांक सांगलें, ताची बायल आनी रामकृष्ण हांचे मदीं अनैतीक संबंध आशिल्ले. त्या रागान रमेशान रामकृष्णाचो जीव घेतलो. पुलीस हे विशीं तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
