भांगरभूंय | प्रतिनिधी
एकल्याक गोंयांत केली अटक, एनआयएची कारवाय
कारवार, खबरां संस्था ः कारवार सीबर्ड वाठारांत बुधवारा एनआयएच्या अधिकाऱ्यांनी धाड घालून कारवार सीबर्ड शिपयार्डाची गुप्त म्हायती आनी फोटो विदेशी नागरिकांक दिल्ल्याच्या आरोपा खाला तिगांक अटक केली.
‘इंडियन एक्सप्रेसा’न दिल्ले म्हायती प्रमाण, सुनील नायक (तोडूर), वेतन तांडेल (मुगदा) आनी अक्षय नायक (अंकोला हळवळी) अशीं अटक केल्ल्यांची नांवा आसात. हांतूतल्या अक्षय नायक हाका गोंयांत अटक केल्या.
कारवारांत सीबर्ड येवजणेच्या विस्ताराचें काम चालू आसा आनी हे तिगूय थंयच्या कंत्राटदारा कडेन काम करताले. तातूंतलो अक्षय नायक हो थंयचे काम सोडून गोंयांतल्या एका कॅन्टीनांत काम करतालो. राष्ट्रविरोधी काम करपी दीपक नांवाच्या मनशाक आनी ताच्या वांगड्यांक 2023 वर्सा हैदराबादांत अटक केल्ली.
तांची चवकशी करतना कारवारांतल्या ह्या तिगांचीं नांवां मुखार आयलीं. तांणी कारवार सीबर्ड शिपयार्डाचे फोटो आनी गुप्त म्हायती दीपकाक दिल्ली. उपरांत ताणें ती म्हायती विदेशी नागरिकांक दिली. हे म्हायतीच्या बदलाक कारवारातल्या तिगांच्या खात्यांत पयशेय जमा जाल्ले अशीं म्हायती छापून आयल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
