भांगरभूंय | प्रतिनिधी
नवी दिल्ली, खबरां संस्थाः देशांत आत्महत्या करपाचे प्रमाण बरेच वाडटा. आत्महत्या करपाक वेगवेगळी कारणां आसात. तांतूत सगळ्यांत चड विद्यार्थ्यांच्या आत्महत्येचें प्रमाण आसा.
अशासकीय संस्था ‘आयसी 3’ च्या नव्या अहवाला प्रमाण विद्यार्थ्यांचे आत्महत्या करपाचें प्रमाण लोकसंख्या वाड आनी एकंदर आत्महत्या वाड दरा परस चड आसा. अहवाला प्रमाण 2021 ते 2022 ह्या काळांत विद्यार्थ्यांच्या आत्महत्यांत 4.2 टक्क्यांनी वाड जाल्या. जाल्यार वट्ट आत्महत्याचें प्रमाण 2 टक्क्यांनी वाडले. दोनूय वर्सांत फकत महाराष्ट्रांत विद्यार्थ्यांच्या आत्महत्यांचो आंकडो चड म्हळ्यार 14% आसा. कोचिंग हब आशिल्ले राजस्थान 571 आत्महत्या सयत 10वे सुवातेर आसा, जाल्यार महाराष्ट्र 1,764 आत्महत्या सयत पयल्या क्रमांकाचेर आसा. 2022 वर्सा देशांत 13,044 विद्यार्थ्यांनी आत्महत्या केली. दोन दशकांत हें प्रमाण एकंदर आत्महत्या प्रमाणा परस दुपेटीन नेटान वाडलां.
एनसीआरबीच्या आंकडेवारी प्रमाण 2000 वर्सा देशांत 5,352 विद्यार्थ्यांच्या आत्महतेची प्रकरणा मुखार आयल्यात. 2022 वर्सा हो आंकडो 13,089 जालो. 2000 वर्सा आत्महत्या करपाचे वट्ट 1,08,593 प्रकरणां आशिल्ली. 2022 वर्सा ती 1,64,033 जाली. विद्यार्थ्यांच्या आत्महत्या करपाच्या मळार तमिळनाडू देशांत दुसरें क्रमांकाचेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
