भांगरभूंय | प्रतिनिधी
खेळ फकत आमचे भलायके खातीरूच न्हय तर आमचे मानसीक भलायके खातीरूय खूब म्हत्वाचो. तातूंतल्यान जायते फायदे मेळटात, आयज २९ ऑगस्ट हो राष्ट्रीय खेळां दीस. राष्ट्रीय खेळां दीस मनोवपा खातीर २९ ऑगस्ट कित्याक वेंचून काडलो हें तुमकां खबर आसा? ह्या दिसा विशीं कांय गजाली जाणून घेवया.
२९ ऑगस्टाक कित्याक मनयतात राष्ट्रीय खेळां दीस?
२०१२ वर्सा सावन दर वर्सा २९ ऑगस्ट हो राश्ट्रीय खेळां दीस म्हणून मनयतात. ध्यान चंद हो म्हान खेळगडो ह्या दिसा जल्मलो. मेजर ध्यान चंद हाका हॉकीचो जादूगर अशें म्हणटात. २२ वर्सांच्या कारकिर्दींत ४०० परस चड गोल केल्ल्या ह्या खेळगड्याच्या उगडासाक भारत सरकारान २०१२ वर्सा सावन ताच्या जल्म तारखेक राष्ट्रीय खेळां दीस मनोवपाची घोशणा केल्ली. १९५६ वर्सा ताका पद्मभूषण हो देशांतलो तिसरो उंचेलो भोवमान फावो जालो.
ह्या दिसाचो इतिहास
हो दीस म्हान हॉकीपटू मेजर ध्यानचंद हांची जयंती. ताचो जल्म १९०५ वर्सा अलाहाबादच्या राजपूत कुटुंबांत जाल्लो. बापायच्या पावलार पावल दवरून ध्यानचंद सैन्यांत दाखल जाले आनी सैन्यांतूच ते हॉकी खेळपाक लागले. हॉकीच्या जादूगारान देशाक नांव मेळोवन दिलें. ध्यानचंद हे १९२८, १९३२ आनी १९३६ च्या ऑलिम्पिकांत भांगरा पदक जिकपी भारतीय हॉकी संघाचो भाग आशिल्ले. २२ वर्सांच्या कारकिर्दींत तांणी ४०० परस चड गोल केले. ध्यानचंद हांणी १९३६ च्या बर्लिन ऑलिम्पिकाच्या निमाण्या सामन्यांत तीन गोलां सयत संघाचे नेतृत्व केलें, जातूंत तांणी जर्मनी आड ८-१ न जैत मेळयलें. हो खेळ ध्यानचंद हांच्या नेतृत्वा खाला भारताचे हॉकीचें येस आशिल्लें. निवृत्त जाले उपरांतूय ते खेळांत योगदान दित रावले. नॅशनल इन्स्टिट्यूट ऑफ स्पोर्ट्स, पटियाला हांगा मुखेल प्रशिक्षक म्हणून काम करपा वांगडा तांणी राजस्थानांत जायत्या कोचिंग कॅम्पांनीय शिकयलें.
ह्या दिसाचें म्हत्व कितें?
दर वर्सा राष्ट्रीय खेळां दिसा भारताचे राष्ट्रपती अर्जुन पुरस्कार, द्रोणाचार्य पुरस्कार आनी राजीव गांधी खेलरत्न पुरस्कार अशे खेळां संबंदी पुरस्कार भेटयतात. आप-आपल्या खेळांत देशाक अभिमान दिसपी अश्या खेळगड्यांक आनी प्रशिक्षकांचो भोवमान ह्या दिसा करतात. २०१८ वर्सा प्रधानमंत्री नरेंद्र मोदी हांणी उक्तावण केल्ली ‘खेलो इंडिया’ चळवळ ही सरकारान ह्या दिसा सुरू केल्ली. ह्या दिसा देशभरांत वेगवेगळ्यो सर्ती आयोजीत करतात. जायतीं म्हाविद्यालयां, शाळा आनी कार्यालयां ह्या दिसाचें म्हत्व मतींत दवरून परिसंवाद आनी खेळ घडोवन हाडटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
