भांगरभूंय | प्रतिनिधी
भांगरभूंय । समीप नार्वेकार
पणजीः केंद्राच्या लखपती दिदी येवजणे खाला गोंयच्या 189 पंचयातींतल्या आपमजत गटाच्यो 10 हजार बायलो नोंद जाल्यात. येणावळ जोडून दिवपी विवीध उपक्रम हातांत घेवन तांकां बरी जीण दिवपा खातीर आपमजत गटांच्या बायलांक प्रशिक्षण दिवपाचें काम लखपती दिदी करतात, अशी म्हायती ग्रामीण उदरगत मंत्रालयान दिल्या.
लखपती दिदी ही एक स्वंयसेवक गटाची वांगडी जिची वर्सुकी येणावळ एक लाखा वयर आसा. आर्थीक येसा वांगडा शास्वत उदर्निवाहाची पद्दत आस्पावन घेवपाक आनी बऱ्या दर्ज्याची जीण साध्य करपाक तांकां उर्बा दिता. येणावळ जोडून दिवपी विवीध उपक्रम हातांत घेवपा खातीर स्वयंसेवक गटाच्या बायलांक उदर्निवाह नियोजना खातीर प्रशिक्षीत समुदाय संसाधन व्यक्ती तांचें मार्गदर्शन करून साधनांचो कसो वापर करचो हें दाखोवन तांचो वावर डिजीटल प्लॅटफॉर्माचेर अपलोड करतात, अशी म्हायती मंत्रालयान दिल्या.
हे येवजणे खाला गोंयच्या 309 गांवांनी 12 क्लस्टर लेव्हल फेडरेशन, 197 गांव संघटणा, 3,833 आपमजत गट आनी 51,913 आपमजत गटाच्या बायलांचो आस्पाव करून घेतला. तातूंतल्यो 10,135 बायलो हो लखपती दिदी म्हूण नोंद जाल्यात आनी 45 समुदाय संसधान व्यक्ती (सीआरपी) तांचें मार्गदर्शन करतात. तशेंच 2 मास्टर ट्रेनर्सा सयत तांची येणावळीची नोंद दवरपा खातीर 361 डिजीटल आजीविका रजिस्टर आसात.
उत्तर गोंयांत 5,673 बायला लखपती दिदी म्हूण नोंद जाल्यात. तांचे खातीर 25 सीआरपी आनी 81 डिजिटल आजीविका रजिस्टर आसात जाल्यार दक्षीण गोंयांत 4,462 बायलो लखपती दिदी म्हूण नोंद जाल्यात. तांचे खातीर 20 सीआरपी आनी 280 डिजीटल आजीविका रजिस्टर आसात.
उत्तर गोंयांत सगळ्यांत चड 5,673 लखपती दिदी बार्देस म्हालांत नोंद जाल्यात. दिवचले 863 , पेडण्यां 1,206, सत्तरी 438 आनी तिसवाडी 1,381 लखपती दिदी नोंद जाल्यात. तांकां मार्गदर्शन करपी सीआरपी फक्त तिसावडी म्हालांत 24 आनी दिवचल म्हालांत 1 आसा. बाकीच्या म्हालांनी सीआरपी ना. जाल्यार फक्त सत्तरी म्हालांतूच 81 डिजीटल आजीविका रजिस्टर आसात. हेर म्हालांनी ही सुविधा ना. दक्षीण गोंयांत सगळ्यांत चड 1221 लखपती दिदी फोंडें म्हालांत नोंद जाल्यात. काणकोणां 787, धारबांदोड्यां 277, मुरगांवां 335, केप्यां 1,064, साश्टींत 458 आनी सांग्यार 320 लखपती दिदी नोंद जाल्यात. तांकां मार्गदर्शन करपा खातीर सीआरपी फक्त फोंडें म्हालांत 20 आसात. बाकीच्या म्हालांनी सीआरपी ना. जाल्यार फक्त फोंडें म्हालांतूच 280 डिजीटल आजीविका रजिस्टर आसात. हेर म्हालांनी ही सुविधा ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
