भांगरभूंय | प्रतिनिधी
फोंड्यां नाट्य तंत्र कार्यशाळेच्या उक्तावण सुवाळ्यांत मुकेश
पणजी: नाटकांतल्या सगल्या घटकांनी, तंत्रज्ञांनी नवकल्पना आनी नवप्रयोग कायम मुखार हाडचे आनी नाटक हो सांघीक आविश्कार सुंदर करपाक हातभार लावचो अशें नामनेचे नाटककार मुकेश थळी हांणी सांगलें. ते फोंड्या नाट्य तंत्र कार्यशाळेच्या उक्तावण सुवाळ्यांत उलयताले.
राजीव गांधी कला मंदिरान आयोजीत केल्ल्या 4 दिसांच्या नाटय तंत्र कार्यशाळेचें मुकेश थळी हांचे हस्तुकीं उक्तावण जालें.
शास्त्र आनी कला हातूंत प्रतिभेचे तांकी वरवीं कला सदांच मुखार आसूंक जाय अशें तांणी नाट्यतंत्र शिकपी भुरग्यांक मार्गदर्शन करतना सांगलें. टायम आनी टायमींग हो नाटकाचो एक मुखेल घटक आसता अशें ही अचूकताय कशी राखूं येता तें तांणी देखी दिवन स्पश्ट केलें.
बादल सरकाराचें एवम् इंद्रजित नाटक आपणें अणकारीत केलें तेन्ना तें कितलें कठीण आशिल्लें हें सांगतना, परत परत ब्लॅक आवट करिनासतना दिग्दर्शकान स्टुलांची मांडावळ कशी हाताळ्ळी आनी नाट्याची सलगताय राखली तेंवूय तांणी विस्कटावणी करून सांगलें.
खूब खेपे नेपथ्य आनी उजवाड हीं दोन पात्रां कशीं नाटकांत खेळत आसतात आनी तें कशें मांडप हें दिग्दर्शकाचें कसब आसता अशें मुकेश थळी हांणी सांगलें.
पड्डो वयर सरना फुडें नेपथ्य लोकां कडेन उलयता, कितें तरी संवाद सांगता, सुचयता आनी तें पयलें पात्र थारायता अशें तांणी म्हळें. नाटकाच्या तंत्र समीकरणाक आनी काळाक अनुसरून तशेंच तंत्रगिन्याक लागून कांय परीवर्तन जालां अशें थळी हांणी म्हळें.
कलाकारांनी नाटकाचे तयारेचो आनंद घेवचो जो सासणाचो तगून उरता अशेंय थळी हांणी सांगलें.
कला मंदिराच्यो वांगडी सचीव स्वाती दळवी हांणीय आपले विचार मांडले. फुडारांत नाट्य संहिता लेखनाची कार्यशाळा घेवपाचो कला मंदिराचो प्रस्ताव आसा अशें दळवी हांणी सांगलें.
कांय वर्सां आदीं रंगवण म्हळ्यार मेक अप ह्या विशयाचेर कार्यशाळा घेतिल्ली. हे कार्यशाळेक घसघशीत प्रतिसाद मेळ्ळा देखून तांणी धादोसकाय उक्तायली.
नेपथ्य आनी उजवाडा येवजण हें तंत्र शिकोवपाचे हे कार्यशाळेंत रंगकर्मी विष्णुपद बर्वे आनी अविनाश च्यारी मार्गदर्शन करतात. सुमार साठ कलाकारांक तातूंत प्रशिक्षण दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
