भांगरभूंय | प्रतिनिधी
म्हापशें ः जेवण आनी वखदां प्रशासनान (एफडीए) म्हापशें नवो बस स्टॅण्ड तशेंच वेर्ला- काणक्यां मिठायेच्या युनिटाचेर छापो घालून सुमार अडेज लाखांचो माल जप्त केलो. वेर्ला नितळ नाशिल्ले सुवातेचेर चलपी मिठायेचें युनीट बंद करपाचे निर्देश प्रशासनान दिल्या.
बुधवारा सकाळीं ही कारवाय जाली. पयलीं प्रशासनाच्या अधिकार्यांनी म्हापशें आंतरराज्य बस स्टॅण्डाचेर छापो घातलो. शेजारच्या राज्यांतल्यान लेबला बगर आयिल्लो मसालो, बिस्कीट आनी हेर माल अधिकार्यांक मेळ्ळो. ह्यो १ लाखांच्यो जप्त केल्ल्यो वस्तू म्हापशें पालिकेचे मजतीन विलो लायलो. प्रशासनान भायल्या राज्यांतल्या येरादारी मार्गान आयिल्ल्या मालाचो दर्जो तपासपा खातीर राबयल्ली ही आठवी कारवाय. नितळ तशेंच दर्जो आशिल्ले खावपाच्या जिन्नसांची पुरवण राज्यांत जावपाक जाय. हे नदरेन जागृताये खातीर प्रशासनान ही मोहीम राबयली.
मजगतीं, हे कारवाये वेळार प्रशासनाक वेर्ला-काणका हांगा एके कुडींत बुरशे अशे सुवातेर जी नितळ नाशिल्ली थंय मिठाय आनी फरसाण तयार केल्ल्याची म्हायती मेळ्ळी. ते प्रमाण प्रशासनाच्या पंगडान ह्या युनिटाचेर धाड घातली. ह्या वेळार हे मिठायेंत मिठाय आनी फरसाण करपाचें काम सुरू आशिल्लें. परवान्या बगर हें युनीट चलयिल्ले खातीर संबंदीत वेवसायीकाक काम बंद करपाची नोटीस जारी करून हें युनिट बेगोबेग बंद करपाचे निर्देश प्रशासनाच्या अधिकार्यांनी दिले.
जेवण आनी वखदां प्रशासनाचे अधिकारी रिचर्ड नोरोन्हा, राजाराम पाटील, शैलेश शेणवी, अमित मांद्रेंकार, लेनिन डिसा, साफीया खान, भक्ती वाळके, साईनाथ मांद्रेंकार, बाबजी कोरखोणकार आनी प्रदीप पार्सेकार ह्या पंगडान ही कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
