भांगरभूंय | प्रतिनिधी
नवी दिल्ली, खबरां संस्था ः भारतान अमेरिकेक 73 हजार सिग सॉअर असॉल्ट रायफलां खातीर दुसरी ऑर्डर दिली. सूत्रांनी दिल्ले म्हायती प्रमाण भारतान 837 कोटी रुपयां खातीर ही कबलात केल्या. हाचे आदीं फेब्रुवारी 2019 वर्सा फास्ट ट्रॅक खरेदी खाला भारतान 647 कोटी रुपयांची 72,400 एसआयजी-716 रायफली ऑर्डर दिल्ली.
रायफलांचे दुसरे ऑर्डरीक संरक्षण मंत्री राजनाथ सिंह हांच्या फुडारपणा खाला संरक्षण संपादन मंडळान डिसेंबर 2023 वर्सा मान्यताय दिल्ली. ताची डिलिव्हरी उपरांत भारतीय सैन्या कडेन 1.45 लाख सिग सॉअर अॅसाल्ट 716 अॅसाल्ट रायफल्स आसतल्यो.
भारतान अमेरिकेक दिली ऑर्डर
2018-19 वर्सा रायफलांची वाडत आशिल्ली गरज भागोवपा खातीर भारतान रशिये कडल्यान एके-203 कलाश्निकोव्ह रायफल मागयल्ल्यो. पूण ही ऑर्डर मेळपाक कळाव जाल्ल्यान भारतान फेब्रुवारी 2019 वर्सा अमेरिकन फर्म सिग सोह कंपनी कडेन रायफला खातीर कबलात केली. पयल्या क्रमांकाच्या 72,400 रायफलींतल्यान 66,400 रायफली लश्कराक, 4,000 वायुसेनेक आनी 2,000 नौदलाक दिल्ल्यो. चीन- पाकिस्तान शिमेचेर तैनात आशिल्ल्या पांयदळ सैनिकांक ह्यो रायफली दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
