भांगरभूंय | प्रतिनिधी
पणजी: तॉमास स्टीवन्स कोंकणी केंद्रान बार्देस आनी तिसवाडी म्हालांतल्या सातवे यत्तेच्या विद्यार्थ्यां खातीर ‘गोंयची लोककाणी’ सांगपाची सर्त आयोजीत केल्या. ही सर्त शेनवार ता. २१ सप्टेंबराक पर्वरीच्या तॉमास स्टीवन्स कोंकणी केंद्राच्या हॉलांत जातली. हे सर्तींत वांटो घेवपा खातीर ह्या दोनूय म्हालांतल्या शाळां कडल्यान प्रवेशिका मागयल्यात.
हे सर्ती खातीर दरेके शाळेक दोन विद्यार्थी धाडपाक मेळटले. तांचीं नांवां शाळांक धाडिल्ले प्रवेशिके वरवीं १२ सप्टेंबर मेरेन तीं केंद्रा कडेन पावोवप गरजेचें आसा.
सर्तीच्या नेमां प्रमाण विद्यार्थ्यांक गोंयची लोककाणी पंगडान, गावन वा दोनूय तरांचो वापर करून सांगपाक मेळटा. काणी कोंकणींतल्यान सांगूंक जाय. कथनाची शैली, काणयेची निवड, हावभाव, सुरेलपण, परंपरीकता हे घटक मतींत घेवन इनामां खातीर सर्तकांची निवड करतले. दरेके शाळेच्या दोनूय सर्तकांक मेळिल्ल्या गुणांची बेरीज करून शाळांक फुडलीं रोख इनामां दितले. काणी सांगपाक उण्यांत उणीं पांच मिण्टां आनी चडांत चड सात मिण्टां मेळटलीं. हे सर्तींत पयलें इनाम रोख रु. ३५००, दुसरें रु. ३०००, तिसरें रु. २५००, चोवथें रु. २००० आनी पांचवें रु. १५०० आनी दरेका सर्तकांक प्रमाणपत्र भेटयतले, अशें केंद्रान कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
