भांगरभूंय | प्रतिनिधी
विंडहोक, खबरां संस्था ः आफ्रिकेंतल्या जायत्या देशांनी सद्या दुकळाची परिस्थिती निर्माण जाल्या. नामिबिया देशाक सगळ्यांत चड फटको बसला. ह्या देशांत लोकांक खावपाक खाण, जेवण लेगीत मेळना. अशे परिस्थितींत उपाशी रावून लोकांक मरण येवचें न्हय म्हूण नामिबिया सरकारान 83 हत्तीं सयत 723 जनावरांक मारून तांचें मांस लोकांक खावपाक दिवपाचो आदेश दिला.
नामिबिया सरकाराच्या पर्यावरण मंत्रालयान हे संबंदीं परिपत्रक जारी केलां. सरकारान वट्ट 723 जनावरांक मारपाचो आदेश दिला, तातूंत 83 हत्ती, 300 झेब्रा, 30 पाणघोडे, 60 म्हशीं आनी हेर जनावरांक मारुन तांचें मांस लोकांक खावपाक दिवपाचो आदेश दिला. ह्या निर्णयाक लागून अन्नधान्याची गरज पुराय जातली आनी तशेंच सरकाराचो पशुपालनाचेर जावपी खर्च उणो जातलो अशें परिपत्रकांत म्हणलां. नामिब नौक्लुफ्ट पार्क, मँगेट्टी नॅशनल पार्क, ब्वाबवाता नॅशनल पार्क, आनी एनकासा रुपारा नॅशनल पार्कांतल्या जनावरांक मारपाचो आदेश सरकारान दिल्ल्याचें परिपत्रकांत म्हणलां.
फुडल्या म्हयन्यांत नामिबियांत अन्नधान्याचो आनीक खर उणाव जातलो असो अदमास संयुक्त राश्ट्रांनी उक्तायला. अशे परिस्थितींत मनीस- रानवटी जनावरांचे संघर्श वाडपाची शक्यताय आसा. ते खातीर सरकारान हो निर्णय घेतला अशें नामिबिया सरकार सांगता.
म्हत्वाचें म्हणल्यार जनावरांक मारून तांचें मांस लोकांक खावपाक दिवपाची ही पयली खेप न्हय. नामिबियान हाचें आदीं असो निर्णय घेतला. कांय वर्सां आदीं जाल्ल्या दुकळाच्या काळांत सरकारान 200 परस चड जनावरांक मारपाचो आदेश दिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
