भांगरभूंय | प्रतिनिधी
सद्या जायते जाण ग्रीन टी पिवप चड पसंत करतात. कारण ग्रीन टी लागून वजन उणें जाता, कातीची भलायकी सुदारता अशें म्हण्टात. ताका लागून ग्रीन टी पिवपी लोकांचो आंकडो दिसान दीस वाडत आसा. पूण, ह्या ग्रीन टीक लागून काळजाच्या दुयेंसांचो धोको उणो जाता अशी म्हायती एका संशोधनांतल्यान मेळ्ळ्या.
यूकेच्या एका नव्या अभ्यासा प्रमाण, जायतीं वर्सां नेमान च्या पियेल्यार काळजाच्या दुयेंसाक लागून मरण येवपाचो धोको उणो जाता. तशेंच सात वर्सां परस चड काळ दिसाक दोन कप च्या पियेवपी प्रौढांक काळजाचो आताक वा स्ट्रोक जावन मरण येवपाचो धोको, जे कमी च्या पियेतात वा च्या पिनात त्या लोकां परस 19 टक्के उणो आसता.
च्या काळजाचे भलायकेक कशी मजत करता?
च्यांत काळजाची राखण करपी संयुगां आसतात, जीं दाह आनी पेशींचें लुकसाण हांचे आड झुजतात, जाका लागून रगतपेशींची भलायकी सुदारता. सादारणपणान ब्लॅक आनी ग्रीन टी पियेल्यार फ्लेव्होनॉइड्स आनी पॉलीफेनॉल्स सारकिल्या अँटिऑक्सिडंट्साक लागून काळजाचो आताक आनी स्ट्रोक जावपाचो धोको उणो आसता.
ग्रीन टींतलें एक संयुग ब्लॉकेज संबंदीत आशिल्लीं प्लेक्स तोडपाक मजत करूंक शकता. ग्रीन टी पियेल्यार कोलेस्टेरॉल आनी रगतदाब उणो जाता अशें कांय अभ्यासांतल्यान दिसून आयलां. कारण तातूंत कॅटेचीन आसतात, जे थ्रॉम्बोसिस आनी प्लेटलेट्स हायपरॅक्टिव्हिटी आडायतात. ताका लागून मुता संबंदीत त्रास उणो जाता. ताका लागून रगतदाबूय उणो जाता.
तुमी फावो त्या प्रमाणात च्या पियेतात?
च्यांत भलायकेक बरी आशिल्ली संयुगां आसतात; पूण ताचो फायदो स्पश्टपणान पळोवपा खातीर नेमान फावो त्या योग्य प्रमाणात च्या पियेवप गरजेचें. च्यांत कॅफीन आसता. पूण हें प्रमाण कॉफी परस उणें आसता. पूण ताचें चड प्रमाणांत पियेवप जाता काय ना हाचेर लक्ष दिवप गरजेचें. कारण हेर खंयच्याय प्रकारच्या च्या परस ब्लॅक च्यांत चड प्रमाणांत कॅफीन आसता. ब्लॅक च्याच्या एका कपांत 47 मिलिग्राम, ग्रीन टींत सुमार 28 मिलीग्राम आसता. देखून ती चड पिवची न्हय. तेभायर च्यांत टॅनीन आसता, जें पॉलिफेनॉलचा एक भाग आसा. ताका लागून पचन क्रियेक लुकसाण जावं येता आनी अन्न पदार्थांतल्यान कुडीक मेळपी लोखणाच्या शोशणाचेर परिणाम जाव येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
