भांगरभूंय | प्रतिनिधी
पांच नेण्ट्या चल्यांक अटक : आदल्या वादांतल्यान केलो खून
सांगली, खबरां संस्था : जामवाडीच्या मरगुबाय देवळा लागसार एका तरणाट्याचो खून केलो. तकलेर कोयत्यान वार करून ताका सोंपयलो. हनुमान जयंती दिसा जाल्ल्या वादांतल्यान पांच जाणांनी हो खून केल्ल्याचें तपासा उपरांत उक्ताडार आयलें. ह्या प्रकरणांत पांच नेण्ट्या चल्यांक ताब्यांत घेतल्या, अशी म्हायती सांगली शार पुलीस उपअधीक्षकान दिली.
अनिकेत तुकाराम हिप्परकर (२२, जामवाडी) अशें ह्या तरणाट्याचें नांव. तो कब्बडीपटू. एके संस्थेंत तो पिग्मी एजंट म्हणून काम करतालो. हनुमान जयंती वेळार ताचें कांय भुरग्यां वांगडा झगडें पेटिल्लें. तेन्ना ताणें एकल्याच्या कान्सुलार मारिल्लें. तो राग दुबावीत मनान धरून आशिल्ले.
नेमकें कितें घडिल्लें?
मरगुबाई देवळा लागसार अनिकेत राविल्लो. तेन्ना दुबावीत नेण्टे चले आयले. त्या सगळ्यांनी आदीं जाल्ल्या वादाची जाप अनिकेताक विचारली. ताचे वेल्यान तांचे मदीं परत वाद जालो. उपरांत दोगा चल्यांनी अनिकेताचेर कोयत्यान वार केले. तकलेर कोयत्यान वार केल्ल्यान अनिकेत थंयच पडलो. उपरांत दुबावीत अनिकेताक थंयच सांडून पळून गेले. ह्या हल्ल्याची म्हायती मेळटांच पुलीस घडणुके सुवातेर दाखल जाले. पंचनामो करून तांणी दुबावितांचो श्वान पंगडा वरवीं सोद घेवपाचो यत्न केलो तेन्ना ते कर्नाळ रस्त्या वटेन पळून गेल्ल्याचें कळ्ळें. पुलिसांनी फाटलाव केलो. कांय वेळांतूच पांचूय दुबावीत पुलिसांक सांपडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
