भांगरभूंय | प्रतिनिधी
नवी दिल्ली, खबरां संस्था ः नामिबियांतल्यान हाडिल्ले चित्ते मध्य प्रदेशांतल्या कुनो राश्ट्रीय उद्यानांत रावतात. तांतूल्या पवन नांवाच्या चित्त्याक मरण आयिल्ल्याची म्हायती रान अधिकाऱ्यांनी दिली. जेमिनी ह्या पांच म्हयन्यांच्या आफ्रिकन चित्तेक 5 ऑगस्टाक कुनो हांगा मरण आयलें. ते उपरांत आतां पवन चित्तेक मरण आयलें. पवनाच्या मरणा उपरांत आतां कुनो नॅशनल पार्कांत 24 चीत्ता उरल्यात. तातूंतले 12 प्रौढ आनी तितलीच नवजात पिलां आसात.
सिंह प्रकल्प संचालक आनी एपीसीसीएफ प्रकल्प अधिकारी उत्तम शर्मा हांणी हे विशीं निवेदन जारी करून पवनाच्या मरणा विशीं म्हायती दिली. मंगळारा सकाळीं 10.30 वरांचेर कुनो हांगाच्या नाल्यांत पवनाची कूड मेळ्ळी अशें तांणी सांगलें. पशुवैजकान पवनाचे कुडीची बारीकसाणेन तपासणी केल्यार उदकांत बुडून पवनाक मरण आयिल्ल्याचो अदमास तांणी उक्तायलो.
पवनाक 17 सप्टेंबर 2022 दिसा, प्रधानमंत्री नरेंद्र मोदी हांच्या वाडदिसा नामिबियांतल्यान भारतांत हाडिल्लो. पयल्या खेपांत आठ चीत्ते हाडिल्ले. तातूंत पांच मादी आनी तीन नर चीत्ते आशिल्ले. जांतूत पवन हो सगळ्यांत वेगान धांवपी चित्तो आशिल्लो.
आतां मेरेन 12 चित्त्यांक मरण
भारतांत चित्ते आयले उपरांत 26 मार्च 2023 दिसा साशा मादीक मरण आयिल्लें. ते उपरांत उदय, दक्षा, तेजस, सूरज, धात्री, शौर्य आनी आतां पवनाक मरण आयलां. तशेंच पांच पिलांकय मरण आयलां. हाका लागून वट्ट 12 चित्त्यांक मरण आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
