भांगरभूंय | प्रतिनिधी
अन्न आनी वखदां प्रशासनाची कारवाय
म्हापशें: करासवाडो, म्हापश्यां भाड्याचे सुवातेंत परवानो नासतना खाद्यपदार्थ तयार करपी प्रकल्पाचेर अन्न आनी वखदां प्रशासनान धाड घालून निकृश्ट दज्याचें 1 लाख रुपयांचें भेसळ केल्लें फरसाण जप्त केलें. जप्त केल्ल्या ह्या म्हालाचो उपरांत विलो लायलो.
चवथीचे फाटभुंयेर अन्न आनी वखदां प्रशासनान अन्नपदार्थ तयार करपी सुवातांची पळोवणी करतात. ते प्रमाण करासवाड्यार एका प्रकल्पाचेर काल (मंगळारा) दनपारां अन्न आनी वखदां प्रशासनाच्या पंगडान धाड घाली. फाटल्या कांय दिसां सावन ह्या फरसाण वेवसायिकाच्या मागार हो पंगड आशिल्लो.
प्रकल्प चलोवपी आयूब खान हो वेवसायीक पॅकेटांनी फरसाण बांदून तो ल्हान विक्रेत्यांक विकतालो. ह्या पॅकेटाचेर गरजेची म्हायती आशिल्ले लेबल्स नाशिल्ले. जप्त केल्ल्या म्हालांत विवीध प्रकारचें फरसाण आनी शेवाचो आस्पाव आशिल्लो.
प्रशासनाचे वरिश्ठ अन्न सुरक्षा अधिकारी रिचर्ड नोरोन्हा, राजाराम पाटील, लेनीन डिसा, भक्ती वाळके आनी प्रितम परब ह्या पंगडान ही कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
