भांगरभूंय | प्रतिनिधी
बाणस्तारी अपघात प्रकरण
पणजी: बाणस्तारी अपघात प्रकरणांत अॅड. अमीत पालेकार हाणें जामिनाच्या अटीचें उल्लंघन केल्ल्यान फोंडेंच्या अतिरिक्त सत्र न्यायालयान ताचो जामीन रद्द केल्लो. ह्या आदेशाक पालेकारान मुंबय उच्च न्यायालयाच्या गोंय खंडपिठांत आव्हान दिवन आदेश रद्द करपाची मागणी केल्या. ह्या प्रकरणाची फुडली सुनावणी बुधवारा जातली.
बाणस्तारी अपघात प्रकरणांत पुलिसांची दुशाभूल करून फटीच्या चालकाक पेरपाचो यत्न केल्ल्या प्रकरणांत अॅड. अमीत पालेकार हाचे आड गुन्यांव दाखल केलो. ह्या प्रकरणांत ताका गुन्यांव फांट्यान अटक केल्ली. उपरांत न्यायालयान ताका सशर्त जामीन मंजूर करतना न्यायालयाच्या परवानगे बगर विदेशांत वचपा खातीर बंदी घाल्ली. अशें आसून लेगीत पालेकारान विदेश भोंवडी केल्ल्याचें मुखार आयले उपरांत गुन्यांव फांट्यान ताचो जामीन रद्द करपाची मागणी फोंडेंच्या अतिरिक्त सत्र न्यायालयांत केली.
ह्या प्रकरणांत न्यायालयांत सुनावणी जाली तेन्ना पालेकारान फ्रान्स भोंवडे खातीर परवानगी घेतिल्ल्याचें मुखार आयलें. जाल्यार पालेकारान 25 जानेवारी 2024 ते 29 जानेवारी 2024 मजगतीं, थायलंड (बँकॉक) हांगा भोंवडी केल्ल्याचें मुखार आयलें. तशेंच ताणें 7 मार्च 2024 ते 11 मार्च 2024 मजगतीं, युएई (दुबई), 18 एप्रील 2024 ते 22 एप्रील 2024 मजगतीं, थायलंड (बँकॉक) आनी 18 मे 2024 ते 29 मे 2024 मजगतीं, हाँगकाँग हांगा भोंवडी केल्ल्याचें मुखार आयलें. हे खातीर ताणें न्यायालयाची परवानगी घेवंक नाशिल्ल्याचें मुखार आयलां.
हाची दखल घेवन न्यायालयान पालेकाराचो जामीन रद्द करपाचो आदेश जारी केला. मजगतीं, पालेकारान मंगळारा मुंबय उच्च न्यायालयाच्या गोंय खंडपिठांत याचिका दाखल करून फोंडेंच्या अतिरिक्त सत्र न्यायालयाचो आदेश रद्द करपाची मागणी केल्या. ह्या प्रकरणाची फुडली सुनावणी बुधवारा जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
