भांगरभूंय | प्रतिनिधी
म्हापशेंः हडफडेंच्या सेंट जोजफ हायस्कुलांत चोरी आनी धुळेर म्हापशेंच्या सेंट ऍन्थनी हायस्कुलाची मोडतोड केल्ल्या प्रकरणांत हणजूण पुलिसांनी ६ जाणांक अटक केली. दुबावितां मदीं एकलो १७ वर्सां पिरायेच्या नेण्ट्या भुरग्याचो आसपाव आसा. ताचो सोद पुलीस घेतात.
शाळो सोडिल्ल्याचो दाखलो दिवपाक कळाव लायिल्ल्याचे तिडकीन सेंट जोजफ हायस्कुलांत अडेज लाखांच्या सामानाची चोरी, जाल्यार मजे खातीर धुळेर- म्हापशेंच्या सेंट अँथनी हायस्कुलाची मोडतोड ह्या दुबावितांनी केल्ली. दुबावितां मदले ५ जाण सेंट जोजफ हायस्कुलाचे आदले विद्यार्थी आसात.
किरण अर्जुन महाराणा (१८, रा. पर्रा), रोनित राजेश रेडकार (१८, थिवी), वैभव वसंत जाधव (१८, रा. करासवाडो, म्हापशें), ऑल्विन तिओतोनिक फर्नांडीस (१८, रा. ताबुडकीवाडो, हडफडें), कैफ मेहबूब अली बडिगर (१८, रा. पर्रा) आनी कबिर महावीर प्रधान (२०, रा. बागा हडफडें) अशीं दुबावीतांचीं नांवां आसात.
सेंट जोजफ हायस्कुलांत ३ ऑगस्टाक सांजेवेळार सुमार ४.३० ते ४ ऑगस्टाक सांजेवेळार ६.३० च्या मजगतीं ही चोरी जाल्ली. दुबावितांनी शाळेचे गेटीवेल्यान उडी मारून भितर प्रवेश केलो. उपरांत मुख्याध्यापकांचे कॅबीन, शाळा कार्यालय आनी स्टाफ रूमाचीं कुलुपां तोडलीं. ह्या तिनूय कुडींतले दोन संगणक, मॉनिटर, इन्व्हर्टर, डिव्हीआर, सीपीयू, यूपीएस मेळून अडेज लाखांचें सामान चोरिल्लें. हे विशीं शाळा वेवस्थापनान कागाळ केले उपरांत हणजूण पुलिसांनी दुबावितां आड गुन्यांव नोंद केल्लो.
चवकशे उपरांत पुलिसांनी वयल्या दुबावितांक सोमारा २६ वेर अटक केली. तशेंच तांचे कडल्यान चोरिल्लें डिव्हीआर सोडून हेर सगळें सामान जप्त केलें. पुलिसांनी दुबावितांची चवकशी केली तेन्ना तांणी धुळेर म्हापशेंच्या सेंट ऍन्थनी विद्यालयांतूय आपणेंच चोरी आनी मोडतोड केल्ल्याचें सांगलें. ही चोरयेची घडणूक ९ ऑगस्टाक उक्ताडार आयिल्ली. ८ तारखेर ही चोरी जाल्ली. दुबावितांनी मुख्याध्यापकांचें कॅबीन, वेवस्थापकांचे कॅबीन आनी स्टाफ रूमांतलें सामान, जनेलांचे हारशे फोडिल्ले आनी कागदपत्रां लासून उडयिल्लीं. तशेंच सीसीटीव्हीचो डिव्हीआरूय चोरून व्हेल्लो.
पुलीस निरीक्षक सूरज गांवस हांच्या मार्गदर्शना खाला उपनिरीक्षक रमेश हरिजन, साईश शेटगांवकार, कॉन्सटेबल महेंद्र मांद्रेंकार, रूपेश आजगांवकार, किशन बुगडे, अनिकेत पेडणेंकार, अरूण महाले आनी मंदार नारूलकार ह्या पंगडान ही कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
