भांगरभूंय | प्रतिनिधी
पुणें, खबरां संस्था : चवथी आदीं देड म्हयन्या पयलींच धोल-तासो पंगडांची येसाय सुरू जाता. ल्हान भुरग्या पसून ते तरणाट्यां मेरेन हे येसायेंत वांटेकार जातात. तांची उमेद तोखणाय करपा सारकी आसता. मात ह्या ढोलाच्या आवाजाक लागून ह्या वाजोवप्यां मदीं भलायकेच्यो जायत्यो गंभीर कागाळी उप्रासपाक लागल्यात. फाटीच्या दुखण्या सयत मुतांत रगत अशो कागाळी उक्ताडार आयल्यात.
गणेशोत्सवांत धोल-तासो पंगडांचें म्हत्व वाडलां. देखून ह्या पंगडांचो आंकडोय व्हड प्रमाणांत वाडला. ह्या पंगडांची येसाय गणेशोत्सवा आदीं देड म्हयन्या पयलीं जुलय म्हयन्यांतच सुरू जाता. दर दिसा सुमार देड ते दोन वरां ही येसाय चालू उरता. ह्या पंगडांत आस्पाविल्ल्यो चलयो आनी चले २० ते ३० वर्सां पिरायेच्या गटांतले आसतात. तातूंतल्या जायत्या जाणांक शरिरीक कामाची संवय नासता. देखून बरोच काळ धोल वाजोवन तांकां भलायकेच्यो जायत्यो समस्या निर्माण जातात.
धोल- तासो वाजोवन जावपी त्रास
धोल- तासो पंगडांतले तरणाटे पोटाच्या सकयल्या भागाक ढोल बांदतात. उपरांत त्या जाग्यार धोलाचे हालचालीक लागून जननेंद्रियाचें नुकसान जाता. हाका लागून मुतांत रगत येवपाच्यो कागाळी येतात. फाटल्या कांय दिसांनी म्हजे कडेन अशे दोन ते तीन दुयेंती आयल्यात. हाचे वांगडा ह्या भुरग्यांक पोट दुखपाच्योय कागाळी आशिल्ल्यो, अशें डॉ. शिरीष भावे हांणी सांगलें.
धोल- तासो मंडळांत चड काळ वादन केल्ल्यान चलयां मदीं फाट दुखप, हात दुखप सारकिल्ले प्रस्न निर्माण जातात. सेगीत वादन केल्ल्यान तांचे भलायकेचेर गंभीर परिणाम जावपाचो धोको आसता. कारण कुडीचेर सतत ताण पडल्यार ताचे दुश्परिणाम दिसतात, अशें डॉ. आरती निमकर हांणी सांगलें.
धोल वाजयतना तो कमराक बांदपाची आनी कुडीच्या हालचालींचीय एक खाशेली पद्दत आसता. तो वाजयतना चूक जाल्यार फाट दुखप, हात दुखप सारकिल्ल्यो कागाळी सुरू जातात. तो चुकीचे पद्धतीन वाजयल्यार मणक्यार ताण येवपाक शकता. शारिरीक श्रमाची संवय नाशिल्ल्या भुरग्यांच्या कुडीचेर ताण येवंक शकता आनी भलायकेच्यो कागाळी निर्माण जावंक शकतात, अशें डॉ. मिलिंद मोडक हांणी सांगलें.
मात धोल- तासो टीम फेडरेशनाचे अध्यक्ष पराग ठाकूर हांचें मत वेगळें आसा. ते म्हणटात, धोलाचें वजन सुमार बारा ते चवदा किल, जाल्यार ताशाचें वजन सुमार सात ते आठ किल आसता. देड म्हयनो वरभराची येसाय, विसर्जन मिरवणुकेचो एक दीस वादन करून दुयेंत पडिल्ल्याचें दिसूंक ना. हांव स्वता ४७ वर्सां जालीं, तासो वाजयतां. आतां मेरेन म्हाका स्वताक कसलोच त्रास जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
