भांगरभूंय | प्रतिनिधी
मालवण, खबरां संस्था: छत्रपती शिवाजी महाराजाच्या वावराचो भोवमान करपा खातीर फाटल्या वर्सा नौदळ दिसा निमतान मालवणांतल्या राजकोट किल्ल्यांत छत्रपती शिवाजी महाराजांचो पुतळो उबो केल्लो. थंय १५ फूट उंचायेचो चाबुतरो आनी २८ फूट उंचायेची शिवरायाचो पुतळो आशिल्ली. तो फाटल्या आठ म्हयन्यांत पर्यटक आनी शिव मोगीं खातीर आकर्शणाचें केंद्र जाल्लें. मात सोमारा दनपरां हो पुतळो कोसळिल्ल्यान सगळ्यांक व्हड धक्को बसलो. मजगतीं, भारतीय न्यायीक संहितेच्या जायत्या कलमां खाला कंत्राटदार जयदीप आपटे आनी स्ट्रक्चरल कन्सल्टंट चेतन पाटील हांचे आड केस नोंद जाल्या. हातूंत भ्रश्टाचार, फटवणूक आनी भौशीक सुरक्षिततायेक धोको निर्माण करप अश्या जायत्या कलमांचो आसपाव आसा.
भौशीक बांदकाम खात्यान केल्ले कागाळी उपरांत एफआयआर नोंद जाली. पुतळ्याची बांदावळ उण्या दर्जाची आसा असो दावो केला. तशेंच हे रचणुकेंत वापरिल्ले नट आनी बोल्ट कळमेल्ले आशिल्ले.
थळाव्या नागरिकांनी आनी पर्यटकांनी हाचे पयलीं पुतळ्याचे स्थिती विशीं हुस्को उक्तायिल्लो. २० ऑगस्टाक भौशीक बांदकाम खात्याच्या मालवण विभागांतल्या सहाय्यक अभियंत्यान दिल्ले शिटकावणे आड प्रतिबंधात्मक कारवाय करूंक ना. हे विशीं भौशीक बांदकाम विभागान सांगलें, कळमेल्ले नट आनी बोल्टाक लागून पुतळ्याचे स्थिरतायेक धोको निर्माण जाल्लो. तरीय पूण शिटकावण्यां कडेन आडनदर केली.
पुतळ्याखातीर वापरिल्ल्या स्टिलाक कळम
मूर्त तयार करपाक वापरिल्ल्या तिख्याक कळम लागिल्ली. भौशीक बांदकाम खात्यान ह्या पुतळ्याक कळम आयिल्ल्याची म्हायती नौदळ अधिकार्यांक दिली. हे संबंदी पावलां उबारपाचीय मागणी केल्या अशें सिंधुदुर्गचे पालकमंत्री रवींद्र चव्हाण हांणी सांगलें.
ही मूर्त ही नौदळाची जापसालदारकी आसा
ही मूर्त कोणें बांदली हाचेर दीसभर चर्चा चलताली. भौशीक बांदकाम खात्यान ही मूर्त उबी केल्या असो दावो करून ठाकरे गटाचे आमदार वैभव नायक आपल्या कार्यकर्त्यां सयत मालवणच्या खात्याच्या कार्यालयांत वचून तोडफोड केली. पूण ह्या पुतळ्याची जापसालदारकी नौदळाचेर आसा असो दावो राज्य सरकारान केलो. तशेंच पुतळ्याचें पुराय काम आनी देखरेख नौदळाची जापसालदारकी आसा असोय दावो पालकमंत्री रवींद्र चव्हाण हांणी केलो.
पुतळो कोसळपाची दुर्दैवी आसा. छत्रपती शिवाजी महाराज हे राज्याचें दैवत आनी अस्मिताय. ह्या पुतळ्याची रचना आनी बांदकाम नौदळान केल्ली. कायदो आपल्या हातांत घेवपाचो कोणाकूच अधिकार ना वा गरज ना. हो पुतळो परत आनीक घटमूट बांदतले अशें आस्वासन मुख्यमंत्री एकनाथ शिंदे हांणी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
