भांगरभूंय | प्रतिनिधी
पणजी ः सद्याचें युग म्हळ्यार डिजिटल युग. इंटरनॅट सेवा ही सगळ्यांची मुळावी गरज जाल्या. गोंयांत इंटरनॅट वापरप्यांचो आंकडो बरोच वाडला. लोकसंख्येचे तुळेंत इंटरनॅट वापरप्यांच्या मळार गोंय देशांत पयल्या क्रमांकाचेर आसा. 1 जानेवारी ते 31 डिसेंबर 2023 ह्या काळांत गोंयांतल्या 73 टक्के लोकांनी इंटरनॅटाचो वापर केला. इंटरनॅट आनी मोबायल असोसिएशन ऑफ इंडियाच्या 2023 वर्साच्या अहवालांतल्यान ही म्हायती मेळ्ळ्या.
2023 वर्सा हे संस्थेन देशांतल्या सगळ्या राज्यांनी आनी केंद्रशासित प्रदेशात इंटरनेट पेनिट्रेशन म्हळ्यार त्या राज्यांतल्या वट्ट लोकसंख्येंतल्यान कितले लोक इंटरनॅट सेवा वापरतात हाचो अभ्यास केलो. ह्या अहवाला प्रमाण गोंय उपरांत महाराष्ट्र आनी केरळाचो क्रमांक आसा. हांगाच्या वट्ट लोकसंख्येंतल्या 69 टक्के लोक इंटरनॅटाचो वापर करतात अशें दिसून आयलें. हे वळेरेंत बिहार निमाण्या क्रमांकाचेर आसा. हांगा 37 टक्के लोक इंटरनॅटाचो वापर करताले.
वयल्या काळांत उत्तर प्रदेशांतले 41 टक्के लोक इंटरनॅटाचो वापर करताले. उत्तर प्रदेशांत फाटल्या वर्साच्या तुळेंत इंटरनॅटाचो वापर 8 टक्क्यांनी वाडला. जाल्यार झारखंडांत लोकसंख्येचे 46 टक्के लोक इंटरनॅटाचो वापर करताले. झारखंडांत फाटल्या वर्साच्या तुळेंत 2023 वर्सा इंटरनॅट वापरप्यांचो आंकडो 12 टक्क्यांनी वाडला. बिहार हे वळेरेंत सकयल आसलो तरी 2022 वर्साच्या तुळेंत 2023 वर्सा इंटरनॅट वापरप्यांचो आंकडो 17 टक्क्यांनी वाडला अशें अहवालांत म्हणलां.
गांवगिऱ्या वाठारांनी वापर चड
अहवाला प्रमाण 2023 वर्सा देशांतल्या सुमार 82 कोटी लोकांनी वेगवेगळ्या कारणांक लागून इंटरनॅटाचो वापर केलो. देशांतले अर्द्या परस चड इंटरनॅट वापरपी गांवगिऱ्या वाठारांतले आसात. गांवगिऱ्या वाठारांनी 44 कोटी आनी शारांतल्या 38 कोटी लोकांनी इंटरनॅटाचो वापर केलो. वट्ट वापरप्यांतले 90 टक्के लोक दर दिसा इंटरनॅटाचो वापर करतात. देशांतले वापरपी दर दिसा सरासरी 98 मिनटां वा 1.5 वरां इंटरनॅटाचेर घालयतात. फकत शारी वाठारांचो विचार केल्यार दर दिसा सरासरी 101 मिनटां इंटरनॅट वापरतात. जाल्यार गांवगिऱ्या वाठारांनी दिसाक 94 मिनटां इंटरनॅट वापरतात.
ओटीटी खातीर सगळ्यांत चड वापर
आयएएमएआयच्या अहवाला प्रमाण, 2023 वर्सा देशभरांत ओटीटी सेवा पळोवपा खातीर वा आयकुपा खातीर इंटरनॅटाचो सगळ्यांत चड वापर जालो. वट्ट 82 कोटी इंटरनॅट वापरप्यांतल्यान 70 कोटी लोकांनी ओटीटी पळयले. ते उपरांत 62 कोटी लोकांनी फेसबूक, व्हॉट्सअॅप वा हेर सोशल मिडिया वरवीं संवाद सादपा खातीर इंटरनॅटाचो वापर केलो. जाल्यार सुमार 42 कोटी लोकांनी डिजिटल पेमेंट वा ई-कॉमर्स खातीर इंटरनॅटाचो वापर केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
