बा बेताळा, आमचो गांव वांचय रे देवा…..
भांगरभूंय | प्रतिनिधी
चोपडेंकारांचें बेताळाक गाराणें
पेडणें : चोपडेंच्या दोंगरांचेर चार लाख चौखण मिटरां परस चड जमनीचें जाल्लें रूपांतरण रद्द जावचें म्हूण चोपडेंच्या भावार्थी गांवकारांनी दर्यासम्राट बेताळ (वेताळ) देवाक गाराणें घालें.
‘बा बेताळा एका काळार पडंग आशिल्लो चोपडें गांव तुवें वसयलो. आयज ह्या गांवाचेर बिगर गोंयकारांची नदर गेल्या. आमचो गांव आतां तूंच वांचय रे देवा’ अशें गाराणें लोकांनी घालें. चोपडें गांवाची लोकसंख्या फकत २००, इतली उणी आसा. मात, दोंगराचेर २०० ते ४०० फ्लॅटांचो प्रकल्प जावपाचो आसा. हाका लागून चोपडें गांवाचें अस्तित्व धोक्यांत आसा. ह्या प्रकल्पाच्या लागून चोपडें गांवांत घाणयारें उदक, कोयर, पिवपाच्या उदकाचो प्रस्न उबो रावतलो. ताका लागून सरकारान हाचो विचार करचो. हांगा बांदकामाक सुरवात जाल्या. पायपां घालपाक खूब कडेन खणलां, अशें आगरवाडो चोपडें नागरीक समितीचे अध्यक्ष विवेक गांवकार हांणी सांगलें. सरकारान बेकायदेशीर जमीन रूपांतर फाटीं घेवंक ना जाल्यार ताचे आड न्यायालयांत जाप मागतले. येवपी काळांत हे पंचायतीचेर वर्मा, शर्मा, रेड्डी वेंचून येतले आनी थळाव्यांचें अस्तित्व सोंपपाक कळाव लागचो ना अशें तांणी मुखार म्हणलें.
ह्या वेळार उलयतना चोपडेंचे पंच हेमंत चोपडेंकार हांणी, पर्यावरणाचे नदरेन अती संवेदनशील आशिल्ल्या चोपडेंच्या दोंगरार बिबटो वाग भोंवता. फाटल्या कांय दिसां आदीं रान खात्याच्या पांजर्यांत बिबटो आडकल्लो. आनीक एक बिबटो ह्या दोंगरार आसा. अशें आसतना ह्या दोंगराचे देंवतेर जमीन रुपांतर कशें जाता असो प्रस्न तांणी केलो.
उमेश लिंगुडकार हांणी सांगलें, सामकी उणी लोकसंख्या आशिल्ल्या चोपडें दोंगरावेली जमीन रूपांतर जावप ही आमचे खातीर धोक्याची गजाल. ताका लागून हाचे आड गांवच्या लोकांनी एकठांय येवन लढो दिवपाची गरज आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
