भांगरभूंय | प्रतिनिधी
च वथीची परब सामकी लागीं पावल्या. हे फाटभुंयेर
केंद्र सरकारान जाहीर केल्ली एकवटीत निवृत्ती वेतन
येवजण सुमार 24 ते 25 लाख केंद्रीय कर्मचाऱ्यांखातीर निश्चीत खोशयेंत भर घालुये. विशेश करून गोंय आनी महाराष्ट्र ह्या दोन राज्यांनी जंय चवथ व्हड प्रमाणांत मनयतात थंय केंद्र आनी राज्य सरकारांतले कर्मचारी हे येवजणेक येवकारूच दितले असो अदमास आसा. आतां खंयच्याय गजालींत राजकारण येवचें ना अशें खात्रीन सांगूंक येवचें नाशिल्ल्यान अजून कांय दीस केंद्राचे हे येवजणेचे नेमकें कितें जातलें हें कळपा खातर वाट पळोवची पडटली. पोरणी, नवी आनी आतां एकवटीत अशा एकूण तीन निवृत्ती वेतन येवजण्यांच्या पाशांत केंद्र सरकाराचे कर्मचारी आडकल्यात. कर्मचार्यांच्या चडश्या संघटणां खातीर पोरणे तेंच भांगर अशें सद्या दिसता आनी पोरणेच येवजणे खातीर ही संघटणा आग्रो करीत आशिल्ल्याचें दिसून येता. नवी पेन्शन येवजण जाल्यार कर्मचारी संघटणांनी सरसकट भायरायिल्ल्यानच केंद्र सरकाराक आतां ताचेर पर्याय म्हूण पोरण्या नव्याचो संगम आशिल्ली एकवटीत येवजण घेवन मुखार वचपाची गरज भासली. नवे निवृत्ती वेतन येवजणेक देशांत सगल्या थरांतल्यान जावपी विरोध, विरोधकां कडल्यान ताचें जावपी भांडवल आनी फुडल्या कांय म्हयन्यांत महाराष्ट्रा सयत खूबश्या राज्यांनी जावपी विधानसभा वेंचणुको हाचोच मुखेलपणान विचार करून केंद्र सरकारान आतां एकवटीत निवृत्ती वेतन येवजण जाहीर केल्या हातूंत दुबाव ना.
सरकारी सेवेंत सगली हयात घालयले उपरांत कर्मचार्यांनी तांचे खातीर चड बरी अर्थीक सुरक्षा निवृत्ती काळांत मेळची हाची अपेक्षा करप तशें गैर ना. तशें पळोवंक गेल्यार तो तांचो हक्कच आशिल्ल्यान तांच्या निवृत्ती वेतन विशया वेल्या मागण्यांचेर सरकारान सहानुभुतीपूर्वक विचार करपाची गरज आसा, हे विशीं वाद नासचो. पूण 2004 वर्सा लागू केल्ली नवी निवृत्ती वेतन येवजण निवृत्त कर्मचार्यांक योग्य ती अर्थीक सुरक्षा दिवपाक अपेशी थारिल्ल्यानूच ताचे आड कर्मचारी एकठांय आयल्यात ही वस्तुस्थितीय न्हयकारूंक येवची ना. हाचो फायदो अर्थांतूच कांय विरोधी राजकी पक्षांनी घेतला आनी राजकी फायाद्या खातीर फाटलो फुडलो कसलोच विचार करिनासतना ते खंबीरपणान कर्मचाऱ्यांफाटल्यान उबे रावल्यात. फुडारांत खूबश्या राज्यांनी विधानसभा वेंचणुको जावपाच्यो आशिल्ल्यान केंद्रांतल्या भाजपप्रणीत सरकाराकूय ताची दखल घेवचीच पडटली. हातूंतल्यान एकवटीत निवृत्ती वेतन येवजण भायर आयल्या आनी लाखांनी केंद्रीय कर्मचाऱ्यांखातीर नवी वा एकवटीत हातूंतल्या एकाचो पर्याय स्विकारचो पडटलो. आतां एकवटीत येवजण जाहीर केल्ल्यान विरोधी पक्ष ताका येवकारूच दितले अशी आस्त बाळगूंक येवची ना. निमाणें तांकां राजकारण करपाचें आशिल्ल्यान हे येवजणेचेरूय नाका आशिल्ल्यो कुरापती काडपाचें काम सुरू जालां. सगल्यांत पयली काँग्रेस फुडार्यांनीच विधानसभा वेंचणुके निमतान सरकारान ही येवजण जाहीर केल्ल्याचें रडगाणें गावपाक सुरवात केल्या. तातूंतले दोश सोदप लेगीत सुरू जालां.
नवे निवृत्ती वेतन येवजणेक लागून केंद्रीय कर्मचाऱ्यांमदल्या असंतोषाची दखल घेवनूच ते येवजणेचो परतून विचार करपा खातीर केंद्रीय अर्थ मंत्री निर्मला सितारामन हांणी फाटल्या वर्साच एका उंचेल्या पांवड्या वेले समितीची स्थापणूक केल्ली. आतांची एकवटीत निवृत्ती वेतन येवजण ही वास्तवीक ताचोच परिपाक आसा, पूण विरोधक ताचे कडेन हेतुपुरस्सर आडनदर करतना दिसतात. आतां एक दोन राज्यांच्यो विधानसभा वेंचणुको जाहीर जाल्ल्यो आसतना केंद्र सरकारान नवी एकवटीत निवृत्ती वेतन येवजण जाहीर केल्ल्यानूच विरोधकांची पोटदुखी सुरू जाल्या हेंवूय समजुपा सारकें आसा. आतां पोरणी येवजणूच लागू करपाची आस्वासनां दीत विरोधकांनी राजकी लाव लेगीत करून घेतिल्लो. अशा वेळार केंद्रान पर्यायी येवजण घेवन मुखार येवचें हें विरोधकांच्या पचनाक पडिल्लें दिसना आनी अर्थीक निकशांचो कसलोच विचार करिनासतना काँग्रेसी सयत सगले विरोधक अजून कर्मचार्यांक फटीचीं आस्वासनां दिवन तांची दिशाभूल करचे नात अशी अपेक्षा कोणे बाळगुची न्हय. बलात्कारा सारक्या निंद्य घडणुकांचेंय आयज जें राजकारण करतात तें पळयत जाल्यार राजकी लावा खातीर आयच्या काळांत कांय गजाली वर्ज्य आसात अशें मानपाचे दीस उरिल्ले नात. आतां जाहीर केल्ली एकवटीत निवृत्ती वेतन येवजण सगल्यांचेंच समाधान करतली अशी आस्त बाळगूं येता. हाचें कारण म्हणल्यार निवृत्ती वेतन कर्मचार्यांक जी अर्थीक सुरक्षा अपेक्षीत आसता ताचो विचार हे येवजणेंत केल्ल्याचो दावो सरकार करीत आसा.
एकवटीत निवृत्ती वेतन येवजणेंत सरकार आपलें योगदान पोरण्या येवजणेचे तुळेन 14 बदला साडेअठरा टक्के इतलें दिवपाचें आशिल्ल्यान कर्मचारी संघटणांनी ताका येवकारूच दिला. आतां निवृत्ती वेतन म्हूण 50 टक्के मूळ वेतन आनी म्हारगाय भत्तो अशी जी कर्मचार्यांची मागणी आशिल्ली ती नवी एकवटीत येवजणे खाला कितली मान्य जाल्या हें कळना. पूण एकवटीत निवृत्ती वेतन येवजण कर्मचार्यांचे हीत लक्षांत घेवनूच तयार केल्ल्याचें सरकाराचें म्हणणें आसा. ताका लागून निवृत्ती वेतन प्रस्ना वेल्यान निर्माण जाल्लें वादळ आतां थंड जाता अशें दिसता. काँग्रेस आनी हेर विरोधी पक्षांचो अर्थातूच आपल्या राजकी फायद्या खातीर अजून कांय काळ हो वाद चिघळत दवरपाचो यत्न आसतलो. पोरणें तेंच भांगर ह्याच निकशाचेर कर्मचारी संघटणा घडये आपल्यो मागण्यो मुखार व्हरपाचो यत्न करतल्यो लेगीत. पूण सगलो विचार करूनच हो प्रस्न निकालांत काडप हें म्हत्वाचें आसा. आमच्या ल्हानश्या गोंयांतूय हे येवजणेचो सुमार 40 ते 45 हजार कर्मचारी आनी सेवानिवृती घेतिल्ल्यांक फायदो जातलो. केंद्र सरकारान एकवटीत निवृत्ती वेतन येवजण जाहीर करपाची योग्य वेळ सादल्या हें मान्य करचेंच पडटलें. नाजाल्यार फुडारांत जावपी विधानसभा वेंचणुकांनी ताचो फटको भाजपाक निश्चितूच बसपाचो. आतां काँग्रेस-शिवसेनेक महाराष्ट्रांत निदान हे येवजणेचे भायर वचून राजकी लावा खातीर यत्न करचे पडटले. लाडकी भयण आनी लाडको भाव ह्या लोकप्रीय येवजणेक लागूनय महाराष्ट्रांत विरोधकांचे काम बरेंच कठीण जालां आनी तातूंत हे येवजणेची भर पडल्या.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
