भांगरभूंय | प्रतिनिधी
मालवण, खबरां संस्था: नौदळ दिसा निमतान प्रधानमंत्री नरेंद्र मोदी हांचे हस्तुकीं लोकार्पण जाल्लो राजकोट किल्ल्या वयलो छत्रपती शिवाजी महाराज हांचो पुतळो वादळ, वारो आनी उटंगाराच्या पावसाक लागून आयज कोसळ्ळो. ४ डिसेंबर २०२३ दिसा मालवणच्या राजकोट किल्ल्याचेर ह्या पुतळ्याचो उक्तावण सुवाळो जाल्लो. हे घडणुके उपरांत हांगा वरिश्ठ सरकारी अधिकारी, पुलीस दाखल जाले. शिवाजी महाराज हो सामको संवेदनशील मुद्दो जाल्ल्यान शिवमोगी सामके तिडकल्ल्यात. ताका लागून राजकोट किल्ल्या लागसारा पुलीस बंदोबस्त वाडयला.
मजगतीं, हे घडणुके विशीं कळटकच आमदार वैभव नायक हांणी पळोवणी केली. घडिल्ली घडणूक दुर्दैवी आशिल्ल्यान शिवमोगींनी शांतताय दवरपाचो उलो तांणी मारला. छत्रपती शिवाजी महाराजांचो पुतळो उबारपाचें काम सामकें सकयल्या दर्जाचें जाल्ल्यान दोशींचेर गुन्यांव दाखल करपाची मागणी नायक हांणी केल्या.
मजगतीं, नौसेना दिसा निमतान ४ डिसेंबर २०२३ दिसा राजकोट किल्ल्याचेर छत्रपती शिवाजी महाराज पुतळ्याचें लोकार्पण प्रधानमंत्री नरेंद्र मोदी हांचे हस्तुकीं केलें. नौदळान हें काम केल्लें. लोकार्पणा उपरांत लाखांनी शिवप्रेमी राजकोट किल्ल्याक भेट दिल्ली.
मालवणाक फाटल्या दोन दिसां सावन वादळ, वार्या सयत घसघश्यांनी पावस रकता. आयज सोमारा दनपरां सुमार एक वरांचेर ही घडणूक घडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
