भांगरभूंय | प्रतिनिधी
पणजी ः प्लास्टीकाचो वापर कायमचो बंद करपा खातीर पणजी पालिकेन नवो उपाय काडला. आतां पणजे बाजारांत कपड्याच्यो पोतयो भाड्यान मेळटल्यो. भाड्या खातीर गिरायकांक 20 रुपया शुल्क भरचें पडटलें अशें महापौर रोहित मोन्सेरात हांणी सांगलें. ‘आमची पोती’ हो उपक्रम सोमारा पणजे बाजारांत सुरू जालो. ह्या वेळार कलाकार सागर नायक मुळे, उपमहापौर संजीव नायक, नगरसेवक प्रमय माईणकार, जीआयझेड संस्थेचो फरदिन सिल्व्हेस्टर, आदित्य कुमार आनी हेर हाजीर आशिल्ले.
ह्या उपक्रमा खातीर पणजे बाजारांत वेगळो स्टॉल उबारला अशें मोन्सेरात हांणी सांगलें. 20 रुपया दिवन गिरायकांक कपड्याची पोती भाड्यान घेवंक मेळटा. फुडले खेपे बाजारांत येतकच ती पोती परत दिवन 20 रुपयांची डिपॉझिट रक्कम परत घेवंक शकता. कांय कारणांक लागून पोती इबाडली वा पिंजली जाल्यार लेगीत ती पोती परत करतकच पुराय डिपॉझिट मेळटले. वा पोरणी पोती दिवन नवी पोती मेळोवपाचीय सुविधा उपलब्ध आसा.
महानगरपालिकेच्या आरआरआर केंद्राक दान केल्ल्या कपड्यांतल्यान ह्यो पोतयो तयार करतले. शारांतल्या गटारांनी प्लास्टीक पोतयो आडकून रस्त्यार उदक भरता आनी ताचो त्रास लोकांक जाता. देखूनच आमी हो उपक्रम सुरू केला. अश्टमीच्या फेरयेंतय ‘आमची पोती’ उपक्रमाचे तीन स्टॉल उबारतले. हो उपक्रम येसस्वी जाल्यार शारांतल्या हेर वाठारांनी अशीच सुविधा उपलब्ध करतलें अशें मोन्सेरात हांणी सांगलें.
प्लास्टीक बंदीची खर अंमलबजावणी
पालिका म्हामंडळान पणजे बाजारांत आनी अश्टमी फेरयेंत प्लास्टीक बंदी खरपणान लागू करतले अशें महापौर मोन्सेरात हांणी सांगलें. हाचे खातीर 5 ते 10 हजार रुपया दंड घालतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
