भांगरभूंय | प्रतिनिधी
चिंपरण, खबरां संस्था: देशाच्या दरेका कोनशाक कांय विचित्र घडणुको उजवाडाक येवपाक लागल्यात. कांय दिसां आदीं एका विद्यार्थ्याच्या पोटांतल्यान केंसांचो गुठलो काडपाची घडणूक उजवाडाक आयली. बिहारांतल्या चिंपरण जिल्ह्यांतल्यान एक धक्को दिवपी घडणूक आतां उजवाडाक आयल्या. हांगा एका तरणाट्याच्या पोटांतल्यान चावयांचो घोस, नेल कटर, खिळे, सुरी आनी हेर जायत्यो धातूच्यो वस्तू मेळ्ळ्यो. मोतिहारीच्या खाजगी हॉस्पिटलांत हें ऑपरेशन जालें. ह्या वेळार दोतोराक ह्यो गजाली पळोवन धक्को बसलो. हो प्रकार कितें?
कांय दिसां आदीं मोतिहारांतल्या हॉस्पिटलांत २२ वर्सां पिरायेच्या एका तरणाट्याक दाखल केल्लो. तो पोट दुखपाची कागाळ करतालो. हो एक सामान्य रोग अशें समजून पयलीं हें दुयेंस कोणेंच गंभीरतायेन घेवंक ना. पूण ताच्या पोटांतल्या जें कितें भायर आयलें तें पळोवन सगळ्यांची न्हीद उडली.
एक्स-रे अहवालांत दिसल्यो धातूच्यो वस्तू
ह्या तरणाट्याच्या पोटांतल्यान नेल कटर, सुरी, चावयांचो घोस आनी हेर धातूच्यो वस्तू मेळ्ळ्यात. ऑपरेशन करपी दोतोरांच्या पंगडाचे मुखेली अमित कुमार हांणी पत्रकारांक हे विशीं म्हायती दिली. ह्या तरणाट्याचेर मानसीक उपचार सुरू आसात. कांय दीस फाटीं ताणें आपल्या कुटुंबाक पोटांत दुखपाची कागाळ केल्ली. हाचे उपरांत ताच्या पोटाचो एक्स-रे काडलो. तातूंत धातू सारक्यो वस्तू दिसताल्यो. देखून ताचें ऑपरेशन करपाचें थारायलें. सुरवेक ताची शस्त्रक्रिया जाले उपरांत आमी चावयांचो घोस काडलो अशी म्हायती दोतोरान दिली.
चाकू, नेल कटर आनी हेर जायतें…
आमी रोखडेंच त्या तरणाट्याचेर शस्त्रक्रिया करपाचें थारायलें. कारण एक्स- रेंत ताच्या पोटांत धातूच्यो वस्तू दिसताल्यो. हाका लागून ताच्या जिवाक धोको निर्माण जालो. ताच्या पोटांतल्यान आमी २ वेगवेगळ्यो चावयो, चार इंचाची सुरी आनी २ नेल कटर मेळ्ळे अशी म्हायती दोतोरान दिली.
धोक्याची शस्त्रक्रिया
ही शस्त्रक्रिया खूब धोक्याची आशिल्ली. चड करून अश्यो कागाळी भुरग्यां कडल्यान येतात. ह्या तरणाट्याक बेगीनूच हॉस्पिटलांतल्यान डिस्चार्ज मेळटलो अशें दोतोरान सांगलें. मजगतीं, तरणाट्याच्या कुटुंबांतल्या लोकांनी हे विशीं कसलीच टिप्पणी करूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
