भांगरभूंय | प्रतिनिधी
पुलीस घेतले गूगल मॅप, ड्रोन, आनी हेर सोशल मिडियाची मजत
भांगरभूंय । प्रसाद शेट काणकोणकर
पणजी ः राज्यांतली येरादारीची समस्या सोडोवपा खातीर, येरादारी नेम चालीक लावपा खातीर गोंय पुलिसांनी येरादारी नियंत्रण कक्ष स्थापन केला. ह्या कक्षांतले येरादारी पुलीस ही समस्या सोडोवपा खातीर गूगल मॅप, ड्रोन, आनी हेर सोशल मिडियाचो वापर करतले. ह्या कक्षाचें उक्तावण मुख्यमंत्री डॉ. प्रमोद सावंत हांचे हस्तुकीं मंगळारा जातलें.
पर्वरे मुंबय- गोंय राष्ट्रीय म्हामार्गाचेर उड्डाणपूलाचें काम चालू आशिल्ल्यान दोन सुवातेर म्हामार्ग पांच म्हयने बंद दवरून येरादारी वळयल्या. 8 ऑगस्ट ते 7 डिसेंबर ह्या काळांत जड गाडयां खातीर हो रस्तो पुरायपणान बंद आसा. मोन्ते गिरी – सिप्रस जंक्शन ते सांगोल्डा जंक्शन मेरेनचो 175 मीटर म्हामार्ग येरादारी खातीर बंद आसतलो. दोनूय सर्व्हिस रोडा वेल्यान येरादारी वळयल्या. तशेंच डेल्फिनो जंक्शन ते मॅजेस्टीक कॅसिनो जंक्शन मेरेनचो 220 मीटर म्हामार्ग बंद केला. देखून ह्या वाठारांत व्हड येरादारीची कोंयडी जाता. लोकांचो मोलादीक वेळ, गाडयांचें इंधन फुकट वता.
हाचे भायर राज्यांतल्या जायत्या वाठारांनी पालसणां कोसळिल्ल्यान आनी रस्त्यांचेर उदक भरिल्ल्यान येरादारीची कोंयडी जाता. हाचेर उपाय म्हणून तशेंच येरादारी पुलीस घडणुकेच्या सुवातेर पावून उण्यांत उण्या वेळार येरादारी सुरळीत करपाच्या हेतान येरादारी नियंत्रण कक्ष स्थापन केला. राज्यांत खंयच्याय सुवातेर योरादारीची कोंयडी जाल्यार कक्षा वतीन संबंदीत अधिकाऱ्यांक कळयतले आनी कर्मचाऱ्यांक त्या सुवातेर धाडटले. तशेंच गरजे प्रमाण क्रेन आनी हेर यंत्रणां धाडटले. येरादारी नेंमांचे उल्लंघन करपी आनी गुन्यांवकारांक धरपा खातीरय ह्या कक्षाचो वापर जातलो. पणजी शारांत तशेंच हेर सुवातींनी बसयल्ल्या सीसीटीव्ही कॅमेऱ्यांची मजत ह्या कक्षातल्यान घेतले.
24 वरां सेवा दिवपा खातीर 10 कर्मचारी तैनात
पुलीस नियंत्रण कक्षांत येवपी येरादारी आनी अपघाता संबंदीत कॉल येरादारी नियंत्रण कक्षांत कळयतले. कक्षा वरवीं 24 वरां सेवा दितले. हे खातीर येरादारी खात्यान सुमार 10 कर्मचारी तैनात केल्यात. कक्षात दोन सहाय्यक उपनिरिक्षक, 4 हवालदार आनी 4 कॉन्स्टेबल आसतले. हे कर्मचारी गूगल मॅप, फेसबूक, इंस्टाग्राम, तशेंच हेर सोशल मिडियाचेर नदर दवरतले. ड्रोनाचो वापर करून येरादारी कोयडीची म्हायती घेतले. आल्तिन-पणजी हांगाच्या येरादारी पुलीस मुखेल कार्यालयांत हो कक्ष स्थापन केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
