भांगरभूंय | प्रतिनिधी
सुण्यांचो मनशा कडेन खूब खाशेलो संबंद आसा. हे मनशाचे घट्ट इश्ट. खंयचेय परिस्थितींत ते तुमकां केन्नाच एकटे सोडिनात. ते सदांच तुमचे कुशीक उबे रावतात. तांच्या ह्या विशेश गुणांचो आदर करपा खातीर आनी तांचें जिवीत सुदारपाचो यत्न करपा खातीर दर वर्सा २६ ऑगस्टाक आंतरराष्ट्रीय सुण्यांचो दीस मनयतात. हो दीस मनोवपाची सुरवात कशी जाली? हे विशीं जाणून घेयात…
सुणो आनी मनीस हांचे मदलो संबंद कितलो खाशेलो आनी वेगळो आसता तें उतरांनी सांगूं नज. सुणे सगळ्यांत खरे आनी विस्वासू इश्ट. तुमचे कडेन पाळीव सुणो आसल्यार हें तुमकां चड समजतलें. सांजवेळार दीसभर काम करून घरा येता आनी तुमचो सुणो तुमचे कडेन उमेदीन धांवत येता तेन्ना ती वेगळीच भावना आसता. सुण्यांकय तुमची भावना समजता, अशें म्हणटात. जायते फावट तुमकां दिसलां आसतलें, तुमी जर दुख्खी आसा जाल्यार तुमचो सुणो तुमकां खोशी करपाचो यत्न करता.
आमच्या ह्या खर्या आनी उलोवपाक कळनाशिल्ल्या इश्टांचें आमचे जिणेंत कितलें म्हत्व आसता हें लोकांक कळपा खातीर हो आंतरराष्ट्रीय सुण्यांचो दीस मनयतात. सुण्यांचो दीस मनोवपा खातीर २६ ऑगस्ट कित्याक वेंचून काडलो आनी ताची सुरवात कशी जाली तें पळोवया.
आंतरराश्ट्रीय सुण्यांचो दीस २००४ वर्सा सुरू जालो. ह्या दिसाचो उत्सव पशू कल्याण कार्यकर्तो कॉलिन पेज हांणी सुरू केलो. पूण हो दीस २०१३ वर्सा सावन संवसारभर मनोवपाक सुरवात जाली. ह्या दिसा सुण्यांक जगपा खातीर योग्य वातावरण मेळपाची गरज आसा हाचेर लोकांचें लक्ष ओडून घेवपाचे यत्न करतात. तांची रावपाची सुवात आनी खावपाची संवय सांबाळप खूब गरजेचें. हे विशीं लोकां मदीं जागृताय निर्माण करपा खातीर सुण्यांचो दीस सुरू केलो. ह्या दिसा लोकांक सुण्यांक पोसके घेवपाकय उर्बा दितात. तशेंच बेकायदेशीर सुण्यांच्या कारखान्यांतल्यान तांकां विकत घेवचे परस बचाव घरांतल्यान दत्तक घेवचे असो संदेश दिवपाचो यत्न करतात.
२६ ऑगस्ट हो आंतरराष्ट्रीय सुण्यांचो दीस मनोवपाक वेंचून काडपाचें कारण म्हळ्यार ह्याच दिसा कॉलिन पेज हाचो पयलो पोसको घेतिल्लो सुणो ताच्या घरा पावलो. तेन्ना कॉलिन १० वर्सांचो आशिल्लो. सुण्यां वयल्या मोगांत तांचो पयलो पाळिल्लो सुणो ‘शेल्टी’ हाचो म्हत्वाचो वांटो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
