भांगरभूंय | प्रतिनिधी
गणेश गांवकारः दुदसागर घसघशाचेर वेवसाय बरे तरेन चलिल्ल्याचो दावो
भांगरभूंय । प्रतिनिधी
फोंडें: दुदसागर घसघशाचें आकर्शण पळोवपा खातीर संवसारांतल्या खूबश्या देशांतल्यान पर्यटक येतात. पर्यटकांक लागून थळाव्या लोकांक रोजगार मेळटा. घसघशाचो वेवसाय बरे तरेन चल्ला. खासदार कॅप्टन विरियातो फर्नांडीस हांणी शेनवारा अभ्यास करिनासतना विधान केलां. खासदार फर्नांडीस हांणी लोकांक गरजे भायर खुबळावन घालचे न्हय. खासदारान दुदसागर घसघश्या संबंदांत स्वता अभ्यास करून उलोवचें, अशी सुचोवणी आमदार तशेंच गोंय पर्यटन उदरगत मंडळाचे अध्यक्ष गणेश गांवकार हांणी केली.
फोंड्यां घेतिल्ले पत्रकार परिशदेंत आमदार गांवकार हांचे वांगडा कुळेचे सरपंच गोविंद शिगांवकार, मोलेचे पंच कपील नायक, सागर गांजेकार आनी हेर मानेस्त हाजीर आशिल्ले.
दुदसागर घसघशाचेर येवपी दरेका पर्यटकाक बरी सुविधा उपलब्ध करून दिवपाचो सरकार यत्न करता. सध्या 431 जिपी पर्यटकांक घेवन घसघशाचेरर हाडटात- व्हरतात. पूण मोलें आनी कुळें पंचायत वाठारांतल्यान आनीक 500 जिपी सुरू करपी संबंदांत अर्ज दाखल जाल्यात. सगळ्यांत वेवसाय उपलब्ध करून दिवपाक जावचें ना. ते खातीर ते संबंदांत सरकार निर्णय घेतलें. कांय राजकी लोक ह्या विशयांत हस्तक्षेप करतात. थळाव्या लोकांक खुबळावचे परस वेवसाय सुरळीत करचे खातीर योगदान दिवपाची गरज आसा, अशें आमदार गांवकार हांणी सांगलें. ट्रॅकींग वेवसाया खातीर गरजेच्यो सुविधा उपलब्ध करून दितले. कांय एजेंट अदीक रकम घेवन पर्यटकांक लुट्टाले. तांचेर नियंत्रण दवरपाची गरज आशिल्ली. ते खातीर गोंय पर्यटन उदरगत मंडळान सेवा ऑनलायन करून पर्यटकांची लूट बंद करपाचो यत्न केला. पूण कांय जाण राजकी लाव घेवपाचो यत्न करतात, अशें आमदार गांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
