भांगरभूंय | प्रतिनिधी
खेळगड्यांचें म्हणणें: स्टेडियमाचें लुकसाण, हे मुखार परवानगी दिवची न्हय
भांगरभूंय । प्रतिनिधी
मडगांवः नावेलीच्या मनोहर पर्रीकार स्टेडियम तीन दीस खेळगड्यांक सराव करपाक बंद आशिल्लो. ह्या काळांत लग्न सुवाळ्यांक दिल्ले परवानगेक लागून स्टेडियमाचें लुकसाण जाल्ल्याचो दावो खेळगड्यांनी करून सोशल मिडियाचेर फोटो व्हायरल केल्यात.
राष्ट्रीय खेळां सर्तीचे फाटबुंयेर नावेले मनोहर पर्रीकार इनडोर स्टेडियम बांदिल्लो. ते खातीर सुमार 43 कोटी रुपया खर्च केल्ले. फाटल्या तीन दिसाच्यान नावेलीचो इनडोर स्टेडियम बंद दवरिल्लो. तो एका लग्न सुवाळ्या खातीर दिल्लो. ताका लागून खेळां सर्तीं खातीर मुळाव्यो सुविधा उबारिल्ल्यो आसतना त्यो सुविधा खेळगड्यां खातीर बंद दवरून लग्न सुवाळ्यां खातीर आनी कार्यावळीं खातीर उबारल्यात काय कितें, असो प्रस्न खेळगड्यांनी उपस्थीत केला.
इनडोर स्टेडियमांत बँटमिंटन, बास्केटबॉल, तायक्वांदो अशे खेळ सध्या खेळटात. सकाळ आनी सांजेच्या सत्रांत खेळगडे सरावा खातीर येतात. कोट्यांनी रुपयांचो खर्च करून उबारिल्ली ही सुविधा आतां लग्नां खातीर वापरतात. गोंय सरकार, खेळां खातें खेळां परस महसुलाक चड म्हत्व दिता, अशीय टिका जावपाक लागल्या.
स्टेडियमाचेर खेळपा खातीर येवपी खेळगड्यां वतीन ऑस्कर सिल्वेरा आनी शलील जॉर्ज हांणी खेळां मंत्री, गोंय खेळां प्राधिकरण हांकां निवेदन सादर करून खेळा बगर हेर कसल्याच कामा खातीर स्टेडियमाचो वापर करचो न्हय, अशी मागणी केल्या. आतां लग्न सुवाळे सोंपले उपरांत स्टेडियमाची नितळसाण करतनाचे फोटो व्हायरल जाल्यात. मनोहर पर्रीकार स्टेडियमा बदला मनोहर मंगल कार्यलय केल्ल्याची टिका जाता. तशेंच खेळां सुविधांचो फक्त पयशे मेळोवपा खातीर असो वापर योग्य नाशिल्ल्याचें सांगून निवेदनांत सरकाराचे टिकाय केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
