भांगरभूंय | प्रतिनिधी
मडगांव: दवर्ली दिकरपाले कोमुनिदादच्या जाग्यार सुमार ९० बेकायदेशीर घरां बांदल्यांत. पंचायती कडल्यान नोटीस धाडले उपरांत न्यायालयांतल्यान स्थगिती हाडटले. कोमुनिदादी कडल्यान मात्तूय सहकार्य मेळनाशिल्ल्यान महसूल सचिवांक पत्र बरोवन जमनीची पळोवणी करपा सयत बेकायदेशीर कामां आड एसआयटीची मागणी सरकारा कडेन करतले, अशी म्हायती सरपंच साईश राजाध्यक्ष हांणी दिली.
दवर्ली, दिकरपाल ग्रामसभेंत आयतारा बेकायदेशीर घरांचो विशय चर्चेंत आयलो. गांवांतल्या कोमुनिदादचे जमनीर खुबशीं बेकायदेशीर घरां उबारयल्यांत. पंचायतीन त्या घरांची पळोवणी केल्या. तांकां नोटीस धाडल्या. ४२ घरांक मोडपाच्या आदेशाक न्यायालयान स्थगिती दिल्या. आतां आनीक २८ घरां उडोवपाच्या आदेशाक स्थगिती मेळ्ळ्या. कोमुनिदादची जमीन आशिल्ल्यान तांणी फुडाकार घेवन ह्या बेकायदेशीर बांदकामांचेर कारवाय करपाची गरज आसा. मात ताचे कडल्यान सहकार्य मेळना. ते पळोवणे खातीर येनाशिल्ल्यान महसूल सचिवांना पत्र बरोवन कळयलां. कोमुनिदाद समितीक पळोवणे खातीर धाडपाची मागणी करतले. तशेंच बेकायदेशीर बांधकामांचेर कारवाये खातीर विशेश समितीची (एसआयटी) स्थापना करपाची मागणी सरकारा कडेन करतले. बेकायदेशीर बांदकामांनी रावपी कोयर रस्त्याचेर उडयतात, घाणयारें उदक उक्तडार सोडटात. भलायकी खात्याक पळोवणी करपाक सांगलां. तांचें बरें सहकार्य मेळूंक ना. मात परत एक फावट जोड पळोवणी करतले, अशे सरपंच राजाध्यक्ष हांणी सांगलें.
पळोवणी खातीर गेल्यार जाचो पंचायती कडेन कांयच संबंद ना अशे व्यक्ती पंचायत मंडळ बरखास्त करपाची धमकी दितात. मात सरपंचपद कायमचें नासता. ताका लागून ताचो भंय धरिनासतना आमी काम करतले अशेंय सरपंच साईश हांणी सांगलें
दवर्ली पंचायतीच्या भलायकी उपकेंद्रांत वैजकी अधिकारी केन्नाच नासतात. सप्तकांतल्यान एकदांच दोतोर येतात. ताका लागून कुडतरी भलायकी केंद्रांतल्या दोतोरां कडेन चर्चा केली तेन्ना थाराव संमत करुन धाडपाक सांगलें. ते प्रमाण पुराय वेळ दोतोर उपलब्ध आसतलो असो थाराव संमत केला. तशेंच पंचायतीच्या जाग्यार भलायकी केंद्राचीच निर्मिती करपाची मागणी आमदारांकडेन केल्या, अशेंय सरपंचान मुखार सांगलें.
कोयराचे ब्लॅक स्पॉट गांवांत निर्माण जावचे न्हय म्हणून वायफायचे सीसीटीव्ही कॅमेरे पंचायतीन घेतल्या. मोबायल रेंजीचो प्रस्न आशिल्ल्यान मैदानार स कॅमेरे बसयतले. कांय जाणां कडल्यान कॅमेरे विकत घेवपांत घोटाळो आशिल्ल्याचो आरोप जालो. ते विशीं चवकशी जातली अशें सरपंच साईश हांणी म्हणलें.
सनबर्न फेस्टिवल दक्षीण गोंयां सयत उत्तर गोंयांतूय येवचो न्हय. हाका लागून तरणाटे पिळगेचो फुडार धोक्यांत येतलो अशें नागरीक सांगतात. ते प्रमाण राज्यांत सनबर्न फेस्टिवल जावचो न्हय, असो थाराव घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
