भांगरभूंय | प्रतिनिधी
कळंगूटे: कळंगूटे पुलिसांनी दिओदीता फर्नांडीस (६४, करासवाडो म्हापशें) हांचो खून केल्ल्या प्रकरणांत आकीब उर्फ अमन शौकत खालीफ (मूळ रत्नागिरी) आनी निखिल चंद्रकांत राजे (रा. म्हापसा, मूळ पुणे ) हांकां हणजुणां अटक केली. पुलिसांनी गुन्यांवकारांक तीन दिसांनीच सोदून काडले. पयशे दिवपा घेवपाच्या आनी मालमत्तेच्या वादांतल्यान खून जाल्ल्याचें कळ्ळां.
मजगतीं, नायकावाडा कळंगूटे हांगा मरण आयिल्ल्या दिओदिता हिचो गळो आंवळून खून जाल्ल्याचें पोस्टमार्टमांतल्या अहवालांतल्यान कळ्ळां. हे विशीं कळंगूटे पुलीस दुबावितांक वळखल्ले. मजगतीं दुबावीत शेजारच्या राज्यांत पळून गेल्ल्याचो दुबाव आयिल्ल्या पुलीस पंगडाक थंय धाडिल्ले. फर्नांडीस हिच्या गळ्यांतली भांगराची सरपळी, मोबायल आनी पर्स गायब आशिल्ली. तिचे कडेन बरीच मालमत्ता आसा. ताका लागून हो खून लुटपाच्या हेतान, मालमत्ता हडप करपाच्या काय हेर खंयच्या कारणाक लागून जाला हाचो सोद पुलीस घेताले.
मेळिल्ले म्हायती प्रमाण, आकीब आनी निखील हे दोगूय प्रॉपर्टी ब्रोकर म्हणून काम करतात. फर्नांडीस हिचो खून केले उपरांत ह्या दोगांयनी तिच्या खात्यांतली रक्कम आपल्या खात्यांत घाली. हणजुणच्या पेट्रोल पंपा लागसारच्या एटीएम मशीनांतल्यान पयशे काडटना हणजुणच्या पुलिसांच्या पंगडान तांकां धरले. हे विशीं उत्तर गोंयचे अधीक्षक अक्षत कौशल हांच्या मार्गदर्शना खाला आनी पर्वरीचे उपअधीक्षक विश्वेश कर्पे हांच्या फुडारपणा खाला कळंगूटे पुलीस निरीक्षक परेश नायक तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
