भांगरभूंय | प्रतिनिधी
फोंडें : भोम- अडकोणची ग्रामसभा बगल रस्त्यावेल्यान बरीच तापली. लोकांनी आयतारा ग्रामसभेंत परत बगल रस्त्याचे मागणेचो थाराव घेतलो. राष्ट्रीय महामार्ग संबंदी म्हायती दिवपा खातीर बांदकाम खात्याचे अभियंते आनी पंचायत मंडळा सयत खासा ग्रामसभा घेवपाचो म्हत्वाचो थाराव ग्रामस्थांनी घेतलो. पंचायत कार्यालयांत जागो उणो पडिल्ल्यान ग्रामस्थांचे मागणे प्रमाण कार्यालया भायर उबे रावन म्हत्वाचे थाराव घेतले.
सरपंच दामोदर नायक हांचे अध्यक्षते खाला आयतारा भोमा-आडकोणा ग्रामसभा घेतली. ह्या वेळार सचीव विराज नायक आनी हेर पंच वांगडी हजर आशिल्ले. हातूंत कितल्याशाच ग्रामस्थांक बांदकाम खात्या कडल्यान नोटीस मेळिल्ल्यान ग्रामसभेक जायते ग्रामस्थ हजर आशिल्ले.
बगल रस्त्याची मागणी करपी भोमच्या ग्रामस्थांनी राष्ट्रीय म्हामार्ग संबंदी बांदकाम खात्याच्या अभियंत्या कडल्यान पुराय म्हायती दिवचे खातीर खास ग्रामसभा घेवपाचो थाराव ग्रामसभेंत घेतलो. तशेंच पंचायत मंडळान बगल रस्त्या खातीर थळावे आमदार तशेंच खेळां मंत्री गोविंद गावडे हांचे कडेन चर्चा करपाचोय थाराव ग्रामस्थांनी घेतलो. ह्या वेळार पंचायत मंडळान ग्रामस्थां वांगडा रावपाचो निर्णय जाहीर केलो.
घोग्यांनी पावस कोसळिल्ल्यान ग्रामसभा ल्हानशेंच आशिल्ल्या पंचायत कार्यालयांत सुरु केली. मात व्हडा संख्येन आयिल्ले ग्रामस्थ कार्यालया भायर उरले. ताका लागून निमाणें ग्रामसभा कार्यालया भायरूच घेवपाची मागणी ग्रामस्थांनी केली. उपरांत पावस थारिल्ल्यान पंचायत मंडळान कार्यालया भायरूच ग्रामसभा घेतली. ताका लागून सगळ्यांनी समाधान उक्तायलें.
संजय नायक हांणी १४ फेब्रुवारीक जाल्ले ग्रामसभेंत राष्ट्रीय म्हामार्गा संबंदी पंचायतीन म्हायती घेवपाचो थाराव घेतिल्लो. ते प्रमाण पंचायतीन म्हायती मेळयल्या. उपरांत आयतारचे ग्रामसभेंत परत बगल रस्त्याची मागणी करपाचो थाराव घेतला. थळावे लोक आपल्या मागण्यांचेर ठाम आशिल्ल्यान सरकारान हे विशीं खर लक्ष दिवपाची गरज आशिल्ल्याचें सांगलें.
सरपंच दामोदर नायक हांणी, पंचायत मंडळ ग्रामस्थां वांगडा आसा. तांचे मागणे प्रमाण आयज मेरेन फाटपुरवण केल्या. आयतारा जाल्ले ग्रामसभेंत खास ग्रामसभा घेवपाचो थाराव, वांगडा खेळां मंत्री गोविंद गावडे हांचे कडेन पंचायत मंडळ चर्चा करतलें अशें तांणी सांगलें.
मजगतीं, भोम राष्ट्रीय म्हामार्गचें रुंदीकरण करतले अशी म्हायती ग्रामस्थांक बांधकाम खात्यान दिल्या. मात आयतारा सरपंच दामोदर नायक हांणी ग्रामसभेंत मेळिल्ल्या कागदपत्राच्या आदाराचेर भोमा उडाण पूल उबारतले अशें सांगिल्ल्यान ग्रामसभेंत हाजीर आशिल्ल्यां मदीं प्रस्न निर्माण जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
