भांगरभूंय | प्रतिनिधी
दिवचल : राज्यांत विवीध पुलीस स्टेशनांचेर वट्ट ९ गुन्यांव दाखल आशिल्लो खांपो गुन्यांवकार सतीश गांवस हाका दुबायच्यान येतना मुंबय विमानतळाचेर ताब्यांत घेतलो. तो दोन वर्सां सावन फरारी आशिल्लो. गोंय पुलिसांच्या पंगडान मुंबय वचून ताका अटक केली आनी आयज फांतोडेर ४ वरांचेर ताका दिवचले पुलीस स्टेशनाचेर घेवन आयले. मजगतीं ताका दिवचले पयलो वर्ग न्यायालयांत सादर केलो.
हे विशीं मेळिल्ले म्हायती प्रमाण, सतीश गांवस हो एक खांपो गुन्यांवकार. गोंयच्या विंगड विंगड पुलीस स्टेशनांचेर ९ गुन्यांव, तशेंच विवीध न्यायालयांत चेक बावन्स केल्ल्या प्रकरणांत निगोशिएबल इन्स्ट्रुमेंट्स ऍक्ट, १८८१ च्या कलम १३८ खाला खुबशे अदखलपात्र गुन्यांव नोंद आसात. तो २ वर्सां आदीं दुबय पळून गेल्लो. गोंय पुलिसांनी ताचो सदो घेवन ताचे आड लुक आवट नोटीस जारी केल्ली. ताचीं कागदपत्रां सगळ्या विमानतळांचेर धाडिल्लीं. तो दुबायच्या फ्लायटींतल्यान मुंबय देंवले उपरांत ताका मुंबय पुलिसांनी चवकशे खातीर ताब्यांत घेतलो आनी गोंय पुलिसांक हे विशीं म्हायती दिली. गोंय पुलिसांनी मुंबय वचून ताका अटक केली.
मजगतीं ताका दिवचले पयलो वर्ग न्यायालयांत सादर केलो. न्यायालयान ताका २ दिसांची बंदखण आयकयल्या. उत्तर गोंयचे अधीक्षक अक्षत कौशल हांच्या मार्गदर्शना खाला आनी दिवचलचे उपअधीक्षक सागर एकोस्कर हांच्या नेतृत्वा खाला दिवचले पुलीस स्टेशनाचे पुलीस निरीक्षक दिनेश गडेकार, उपनिरीक्षक अमरनाथ पाळणे आनी हेर पुलीस कर्मचार्यांनी हे विशीं कामगिरी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
