भांगरभूंय | प्रतिनिधी
मडगांव : रुमडामळ दवर्ली ग्रामसभेंत मारुती देवूळ जंक्शना लागसारा येरादारी कोयंडी आनी अपघात वाडल्यात. हांगा येरादारी पुलिसांची नेमणूक करपाची मागणी नागरिकांनी केली. ते प्रमाण थाराव घेवन पंचायती वतीन येरादारी पुलिसांक पत्र धाडटले.
रुमडामळ दवर्ली ग्रामसभा आयतारा सकाळीं पंचायतीच्या सभाघरांत जाली. हे ग्रामसभेंत मारुती देवळा लागसारच्या जंक्शनाचेर येरादारी कोयंडीचो विशय चर्चेक आयलो. बोलशे सर्कला कडेन येरादारी सिग्नल आशिल्लें. आतां फ्लोरियन वाझ सर्कलाचेर येरादारी सिग्नल उबारलां. ताका लागून सिग्नला वेल्यान एकाच वेळा सुटपी वाहनांची गर्दी मारुती देवळा कडल्या जंक्शनाचेर जाता. शाळो आनी म्हाविद्यालय सुटपाच्या वेळार हातूंत आनीक वाड जाता. ताका लागून अपघातांत वाड जाल्या. हाका लागून येरादारी पुलीस तैनात करपाची मागणी नागरिकांनी केल्या.
ह्यान पयलीं येरादारी पुलिसांक हे विशीं कळयिल्लें. ते प्रमाण आमदार उल्हास तुयेंकार हांचे कडेन संपर्क केलो तेन्ना तांणी सांगलें उपरांत दोनूच दीस येरादारी पुलीस हांगा दिसले, अशें संरपंचान सांगलें. हांगां पुलीस कर्मचारी सामके उणे आशिल्ल्याचें कारण दितात आनी ते थंय तैनात करीनात. ताका लागून ग्रामसभेंत थाराव घेतलो आनी पंचायती वतीन येरादारी पुलिसां कडेन पत्रवेव्हार करपाचें थारायलें. तशेंच पंचायत वाठारांतले बागेंत भुरग्यांक खेळपा खातीर उबारिल्ल्या सुविधांचो इबाड जाला. त्यो परत उबारपाचो थारावूय ग्रामसभेंत घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
