भांगरभूंय | प्रतिनिधी
मडगांव: नावेले रस्तो हुपतना वेगान येवपी टॅक्सीन शिरीष पै काणे हांकां धपको दिलो. जखमी काणे हांकां उपचारा मजगतीं मरण आयलें. ह्या अपघातांत मडगांव पुलिसांनी टॅक्सी ड्रायव्हराक ताब्यांत घेतला.
मेळिल्ले म्हायती प्रमाण, शेनवारा रातीं साडेणव वरांचेर काणे हे आपल्या इश्टा सयत भायर वचपा खातीर रस्तो हुपताले. तेन्ना काणकोणचे दिकेन वेगान वचपी एके टॅक्सीन तांकां धपको दिलो. हातूंत ते गंभीर जखमी जाले. तांकां रोखडेच दक्षीण गोंय जिल्लो हॉस्पिटलांत व्हेले. काणे हांची भलायकी गंभीर आशिल्ल्यान तांकां फुडल्या उपचारां खातीर जीएमसींत व्हरपाक सांगलें. मात मडगांवां हॉस्पिटलांत एकूय ऍम्बुलन्स नाशिल्ली. दुसर्या दुयेंतीक घेवन एक ऍम्बुलन्स आयिल्ली. मात, गोमॅकोंत वचपाक तांणी न्हयकार दिलो. एका वरान ऍम्बुलन्स उपलब्ध जाले उपरांत काणे हांकां जीएमसींत व्हेलें. उपचारा मजगतीं तांकां मरण आयलें.
मजगतीं, अपघाता उपरांत मडगांव पुलिसांनी घडणुके सुवातेर येवन पळोवणी केली. अपघाताक जापसालदार आशिल्ली टॅक्सी आनी ड्रायव्हराक तांणी ताब्यांत घेतलो. हे विशीं मडगांव पुलीस निरीक्षक तुळशीदास नायक हांच्या मार्गदर्शना खाला फुडलो तपास सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
