भांगरभूंय | प्रतिनिधी
बांगलादेशान पाकिस्तान आड चालू आशिल्ले पयले टॅस्टीच्या चवथ्या दिसा 94 धांवड्यांची आघाडी घेतली. बांगलादेशान पयल्या डावांत सगल्यो विकेटी व्हगडावन 565 धांवड्यो केल्यो. चवथ्या दिसाचो खेळ सोंपलो त्या वेळार पाकिस्तानान आपल्या दुसऱ्या डावांत 1 विकेट व्हगडावन 23 धांवड्यो केल्ल्यो.
ते पयलीं पाकिस्तानान आपलो पयलो डाव 6 बाद 448 धांवड्यांचेर घोशीत केल्लो.
बांगलादेशाच्या मुश्फिकूर रहिमान 191 धांवड्यांची खेळी केली. जाल्यार मोमिनूल हकान 50, विकेटकीपर बॅट्समन लिटन दासान 56 आनी मेहदी हसन मिराजान 77 धांवड्यांचें योगदान दिलें. पाकिस्ताना वतीन नसीम शाहान 3 विकेटी घेतल्यो. शाहीन शाह आफ्रिदी, खुर्रम शहजाद आनी मुहम्मद अली हाणें दरेकी 2 विकेटी मेळयल्यो.
ओपनर शादमान इस्लाम आनी मोमिनूल हक हांणी डाव सांबाळ्ळो. दोगांयनी पंगडाचो स्कोर 100 वयर व्हेलो. मोमिनूल 50 धांवड्यो करून बाद जालो. अशे तरेन शादमाना वांगडची ताची 94 धांवड्यांची भागिदारी फुटली. ताका खुर्रम शहजादान बाद केलो. उपरांत ताणें शांतो लेगीक बाद केलो. शादमान इस्लाम 93 धांवड्यो करून तंबूंत परतलो.
पार्ट टायम स्पिनर सॅम अय्युबान दिग्गज शाकीब अल हसनाक बाद केलो. शाकीबाक फकत 15 धांवड्यो करप शक्य जाल्यो. बांगलादेशान 218 धांवड्यांचेर 5 विकेटी व्हगडायिल्ल्यो. हांगाच्यान मुश्किफूर रहीम आनी लिट्टन दास हांणी पंगडाक सांबाळ्ळो.
दोगांयनी पंगडाचो स्कोर 300च्या मुखार व्हेलो. मजगतीं, तिसऱ्या दिसाचो खेळ सोंपिल्लो त्यावेळार बांगलादेशान 5 विकेटी व्हगडावन 316 धांवड्यो केल्लयो. चवथ्या दिसाचो खेळ सुरू जालो त्या वेळार रहीम 55 आनी लिट्टन 52 धांवड्यांचेर खेळटालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
