भांगरभूंय | प्रतिनिधी
म्हापशें, प्रतिनिधी ः शूटिंग सर्तींत वांटो घेवपाक आयिल्ल्या खेळगड्यां कडेन पार्किंगा वेल्यान वाद करुन तांकां मारपेट केल्ल्या प्रकरणांत म्हापशें पुलिसांनी गुंड शेलेश गरड उर्फ गरगटलो (खडपावाडो, कुचेली) हाका अटक केली.
ही घडणूक शुक्रारा सुमार 11.45 वरांचेर करासवाड्यार घडली. ह्या प्रकरणाची शूटर कोच विशाल शौकीन (22, दिल्ली) हांणी पुलिशेंत कागाळ केल्या. कागाळदार विशाल शौकीन आपल्या दोन प्रशिक्षणार्थी विद्यार्थ्यां सयत मांद्र्यांच्या यश शूटिंग अकादेमींत राश्ट्रीय शूटींग सर्तींच्या पात्रताय फेरयेंत वांटेकार जाल्ले. तातूंतलो एकलो नेण्टो आनी हातान दिव्यांग आशिल्लो. हे फेरयेंत देशभरांतल्या सुमार 4500 शूटर खेळगड्यांनी वांटो घेतला.
शुक्रारा 23 तारखेर कागाळदार शौकीन विद्यार्थ्यां वांगडा बागा कळंगुटे गेल्ले. थंयच्यान कारासवाड्यार रेंट अ कार गाडयेन धाब्याचेर जेवपाक आयिल्ले. थंय दुबावीत शैलेशान कागाळदाराचे गाडये मुखार आपली गाडी पार्क केली. तशेंच हे गाडयेच्या फाटल्यान दुसरी गाडी उबी आशिल्ली. हाका लागून कागाळदाराक आपली गाडी काडपाक आडखळ आयली. तांणी हॉर्न वाजोवन दुबावितांक गाडी कुशीक काडपाक सांगलें. पूण दुबावीत गरड आनी ताच्या वांगड्यांनी कागाळदारां कडेन वाद घालो. दुबावितान गरड हांणे कागाळदाराच्या कानपटार मारुन ताका गाळी संवल्यो आनी गंभीर परिणाम जातले अशी धमकी दिली, अशी म्हायती पुलिसांनी दिली.
हाका लागून कागाळदाराक आनी ताचे दोगूय प्रशिक्षणार्थी भियेले. देखून तांणी गाडयेंतल्यान एअर पिस्तूल काडले आनी हवेंत फारपेट केलो. हो खरो फारपेट नाशिल्लो, ताणें दुबावितांक फकत भियेवपाचो यत्न केलो. उपरांत दुबावीत गरड हांणे गाडी घेवन पळ काडलो. उपरांत दुबावितान आपल्या वांगड्यां सयत कागाळदाराचो फाटलाव केलो आनी कुचेलीच्या रस्त्यार कागाळदाराची गाडी थांबयली. थंय दुबावीत गरड आनी ताच्या वांगड्यान परतून वाद घालून कागाळदाराक त्रास दिवपाचो यत्न केलो. थंय लेगीत कागाळदारान परतून एक फावट एअर पिस्तूलान हवेंत फारपेट करुन आवाज केलो. उपरांत दुबावीत पळून गेले.
हे घडणुके उपरांत कागाळदार आनी तांचे विद्यार्थी कोरगांवातल्या हॉटेलांत परतले. जाल्यार दुबावीत शैलेश हाणें कांय मिडीया चॅनलांक आपयले आनी म्हापश्यां फारपेट करपाचो यत्न जाल्ल्याचें सांगलें. पूण खरें म्हणल्यार गाडी काडपाच्या कारणावेल्यान दुबावित गरड आनी ताचे वांगड्यांनी पयलींच वाद घाल्लो, अशी म्हायती पुलिसांनी दिली.
ह्या प्रकरणांत, म्हापश्यां पुलिसांक दुबाविता आड भारतीय न्याय संहितेच्या कलम 111, 126, 192, 352, 131, 351 (3), 3 (5) आनी गोंय बाल अधिनियम कलम 8 तशेंच दिव्यांग व्यक्तींचो अधिकार कायदो कलम 92(अ) प्रमाण धमकी, मारपेट आनी गाळयो घाल्या प्रकरणांत गुन्यांव नोंद केलां. तशेंच शैलेश हाका अटक केल्या. दुबाविताच्या वांगड्यांचो सोद पुलीस घेतात.
पुलीस अधीक्षक अक्षत कौशल, उपअधीक्षक संदेश चोडणकार आनी निरिक्षक निखिल पालेकार हांच्या फुडारपणा खाला उपनिरीक्षक बाबलो परब फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
