बाराजण – उसगांवच्या सरकारी शाळेच्या वाठारांतल्या दुरुस्ती कामाक सुरवात
भांगरभूंय | प्रतिनिधी
थळाव्या पंचान शिटकावणी दिले उपरांत बांदकाम खात्यान घेतली दखल
फोंडें, प्रतिनिधी ः बाराजण – उसगांवां शेनवारा सकाळीं पडिल्ल्या पावसाक लागून सरकारी प्राथमिक विद्यालयच्या वाठारांत उदक भरिल्ल्यान विद्यार्थ्यांक त्रास जालो. विद्यार्थ्यांक गटारांतल्या घाणयाऱ्या उदकांतल्यान वर्गांत प्रवेश करचो पडलो. हाका लागून पालक बेजारले. हाचेर उपाय घेवंक ना जाल्यार सगल्या पालकांक घेवन येवन शाळे मुखार बसपाची शिटकावणी पंच मनीषा उसगांवकार हांणी दिली. ताचे उपरांत बांदकाम खात्यान दखल घेवन रोखडोच वाठार दुरुस्त करपाक सुरवात केली.
विद्यालयांत वट्ट 90 विद्यार्थी शिकतात. फाटल्या तीन ते चार वर्सां सावन शाळेच्या वाठारांत मुखेल रस्त्यावेले उदक व्हांवून वता. तशेंच गटारांतलें उदक शाळेच्या वाठारांत भरता. हाका लागून विद्यार्थ्यांक शाळेंत यो- वच करतना त्रास जाताले.
मजगतीं, कांय दिसां पयलीं रस्त्यावेली फोंडकुलां पुरयली नात जाल्यार थळावी पंच मनीषा उसगांवकार हांणी फोंडकुलांनी झाडां लावपाची शिटकावणी दिल्ली. ते उपरांत कांय वरां भितर बांदकाम खात्यान रस्तो दुरुस्त करुन फोंडकुलां पुरोवपाचें काम सुरु केल्लें. शेनवारा लेगीत मनीषा हांणी शाळेच्या वाठारांत उदक भरता ताची दुरुस्ती केली ना जाल्यार पालकांक घेवन शाळे मुखार बसपाची शिटकावणी दिली तेन्ना बांदकाम खात्यान रोखडीच दखल घेवन काम सुरु केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
