… आनी तिणें सीम कार्ड काडपाची पीन गिळ्ळी

भांगरभूंय | प्रतिनिधी

चिपळूण, खबरां संस्था ः मोबायल फोनाचें सीम कार्ड बदलतना पीन वापरची पडटा. पूण, ती तोडांत धरिल्ले बायलेक एका संकश्टाक सामकार वच्चें पडलें. अखेरेक डेरवण- सावर्डेंच्या वालावलकर हॉस्पिटलांत तिच्या स्वास नलिकेंत आडकिल्ली मोबायल सिम कार्डाची पीन दोतोरांनी टाके घालिनासतना ऑपरेशन म्हळ्यार ब्रोन्कोस्कोपी करुन भायर काडली.

रत्नागिरींतले एके 23 वर्सा पिरायेचे बायलेन 20 ऑगस्टाक रातचें मोबायलाचें सिम बदलतना पीन तोंडात दवरिल्ली. ती चुकून तिणें गिळ्ळी. त्या वेळार तिका स्वास घेवपाक वा गिळपाक कसलोच त्रास जालो ना, देखून रातच्या वेळार दोतोरा कडेन वचनासतना ती घरा रावली. दुसरे दिसा सकाळीं ती रत्नागिरीचे सर्जन डॉ. रवींद्र गोंधळेकार हांचे कडेन गेली तेन्ना तांणी अन्ननलिकेची तपासणी केली, पूण पीन दिसूंक ना, मागीर तांणी काळजाचो एक्स-रे आनी सीटी स्कॅन केलें, जातूंत तांकां उजवे वटेन स्वास घेवपाचे नळयेंत ती पीन दिसली. डॉ. गोंधळेकार हांणी रोखडेंच दुयेंतीक वालावलकर हॉस्पिटलांत वचपाक सांगलें.
हॉस्पिटलांत पावतकच ते बायलेक वालावलकर हॉस्पिटलाचे ई. एन. टी सर्जन डॉ. राजीव केणी हांणी तपासलें आनी ऑपरेशन करून श्वास नळयेंतल्यान ती पीन काडपाचो सल्लो दिलो. तिणें हयकार दितकच डॉ. केणी हांणी रोखडीच ऑपरेशनाची तयारी केली. डॉ. केणी हांणी ब्रोन्कोस्कोपी करुन उजव्या फुफ्फुसाच्या स्वास मार्गांत आडकिल्ली पीन भायर काडली.
तोंडांत खिळो, पीन, सुय, सरयो धरपाची संवय खूब लोकांक आसता. लायटीची वायर पसून तोंडांत धरपी लोक आसात. शाॅक लागून कांय जाण मेल्यात पसून. तेन्ना असल्यो गोश्टी कोणें करच्यो न्हय, हेंच हे घडणुकेंतल्यान सिद्ध जाता.