भांगरभूंय | प्रतिनिधी
शुक्रारा बसकेंत 6 मुद्द्यांचेर जाली चर्चाः मुख्यमंत्री
भांगरभूंय । प्रतिनिधी
पणजी : पेडणेंच्या टॅक्सी वेवसायिकांच्या मागण्यांचेर सोमारा पर्वरी मंत्रालयांत परतून बसका जातली. आमदार प्रवीण आर्लेकार हांचे सयत रातीं उसरां जाल्ले बसकेंत 6 मुद्यांचेर चर्चा जाली. आंदोलन फाटीं घेवपाचो तांकां उलो मारला, म्हायती मुख्यमंत्री डॉ. प्रमोद सावंत हांणी दिली.
दनपारची चर्चा फिस्कटले उपरांत रातीं पेडणेंच्या टॅक्सी वेवसायिकां कडेन मुख्यमंत्री डॉ. सावंत हांणी चर्चा केली. जीएमआर कंपनी कडेन टॅक्सी वेवसायिकांचे मतभेद आसात. कांय टॅक्सीकारांक वेवसाय जायना. ह्या समस्यांचेर चर्चा जाली. उपाय काडपा खातीर मुख्यमंत्र्यांनी टॅक्सी वेवसायिकांक सोमारा सकाळीं 11.30 ते दनपारां 12 वरां मदीं आपयल्यात. हाका लागून टॅक्सी वेवसायिकांच्या प्रस्नाचेर उपाय येवपाची शक्यताय आसा.
मजगतीं, कावंटर, टोल, पार्कींग शुल्क ह्या प्रस्नांचेर पेडणेंच्या टॅक्सी वेवसायिकांचें आंदोलन चालू आसा. बिरेस्तारा आंदोलनकर्त्यांनी पेडणेंच्या उपजिल्होधिकारी कार्यालया मुखार बसकण मारली. जो मेरेन मुख्यमंत्री आमचे कडेन चर्चा करिना, ते मेरेन आंदोलन फाटीं घेवचे नात, असो निश्चेव टॅक्सी वेवसायिकांनी उलोवन दाखयलो. मांद्रेंचे आमदार जीत आरोलकार, पेडणेंचे आमदार प्रवीण आर्लेकार, आमदार क्रुझ सिल्वा, दक्षीण गोंयचे खासदार कॅप्टन विरियातो फर्नांडीस, काँग्रेसीचे उपाध्यक्ष सुनील कवठणकार, तारा केरकार हे सगळे आंदोलनाक तेंको दिवपा खातीर बिरेस्तारा पेडण्यां हाजीर आसले. बिरेस्तारा मुख्यमंत्री गोंयांत नाशिल्ले. हाका लागून चर्चा जावंक पावली ना. शुक्रारा दनपारां आमदार प्रवीण आर्लेकार हांचे सयत टॅक्सी वेवसायीक चर्चे खातीर मुख्यमंत्र्यांच्या बंगल्याचेर आयले. आमदार प्रवीण आर्लेकार हांणी मुख्यमंत्र्यांची भेट घेवन चर्चा केली. मुख्यमंत्र्यांनी चर्चे खातीर 10 जाणांच्या शिश्टमंडळाक आपयले. सगळ्या वांगडा चर्चा करपाक मुख्यमंत्र्यांनी न्हयकार दिलो. बंगल्याचेर आयिल्ल्या सगळ्या 25 जाणां कडेन चर्चा करपाचेर टॅक्सी वेवसायीक ठाम रावले. 10 जाणां कडेन चर्चा करपाचो प्रस्ताव टॅक्सी वेवसायिकांनी न्हयकारलो. हाका लागून चर्चा जावपाक पावूंक नाशिल्ली.
टॅक्सी वेवसायिकांक अॅप एग्रीगेटर घेवचोच पडटलो
टॅक्सी वेवसायिकांच्यो योग्य मागण्यो पुराय जातल्यो. पार्कींग शुल्क उणें करपा सयत कावंटराचो प्रस्न लेगीत सुटावो जातलो. मात तांकां अॅप एग्रीगेटर घेवचोच पडटलो. तांचे पसंतीचो अॅप एग्रीगेटर घेवपाची मेकळीक आसा. तशेंच अॅपाचेर आदारीत मिटर बसोवपाची लेगीत मेकळीक आसतली, अशें मुख्यमंत्री डॉ. प्रमोद सावंत हांणी टॅक्सी वेवसायीक बंगल्याचेर येवचे पयली स्पश्ट केलें.
स्वार्था खातीर कांय जाणांचें राजकारण : मुख्यमंत्री
स्वार्था खातीर कांय जाण राजकारण करतात. टॅक्सी वेवसायिकांचें आंदोलन राजकी हेतूंतल्यान प्रेरीत आसा. हो प्रस्न फक्त मोपा वयल्या टॅक्सी वेवसायिकांचो आसा. हेर टॅक्सीकारांचो प्रस्न ना. हेर टॅक्सीकारांच्या प्रस्नाचेर आमदारां सयत चर्चा चालू आसा. पेडणेंच्या टॅक्सीकारां कडेन चर्चा करपाक आपली तयारी आसा. हेर टॅक्सी वेवसायीक वा संघटणां कडेन आपूण चर्चा करचो ना, अशें मुख्यमंत्री डॉ. प्रमोद सावंत हांणी चर्चा फिस्कटले उपरांत स्पश्ट केल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
