भांगरभूंय | प्रतिनिधी
-गोवा फॉरवर्ड अध्यक्ष विजय सरदेसाय हांची शिटकावणीपणजीः मोपा विमानतळाचेर टॅक्सीकारांक सतावपी विशय चवथी पयली सुटावो करचो. जर सरकार अपेसी थारता जाल्यार गोवा फॉरवर्ड टॅक्सीकारांक पुराय तेंको दिवन आमचे पद्दतीन हो विशय सासणा खातीर सोडयतले, अशी शिटकावणी गोवा फॉरवर्ड अध्यक्ष आनी फातोड्डेंचे आमदार विजय सरदेसाय हांणी दिल्या.
गोंयच्या टॅक्सी भावाचो खासा करून मोपा विमानतळा वेलो विशय अापणे फाटल्या विधानसभा अधिवेशनांत मांडिल्लो. सरकारान हो विशय सुटावो करपाचे ठोस आश्वासन विधानसभेंत दिल्लें, पूण सरकारान ते आश्वासन पाळूंक ना आनी जीएमआरचे पोट भरपा खातीर गोंयकार टॅक्सीकारांचे पोट मारपाक फुडें सरला, असो आरोप विजय सरदेसाय हांणी केलो.
मोपा हो लोकां खातीर केल्लो विमानतळ. एका कंपनीचे पोट भरपा खातीर वा तांचे कडल्यान हफ्तो घेवपा खातीर केल्लो विमानतळ न्हय. पेडणेंकार भावा भयणांक उदरगतीचो प्रकल्प आसतलो म्हूण सांगून हेच मोपाक परवानगी घेतिल्ली. पूण सद्या जे चल्ला ते सोंसून घेंवचे नात. सरकाराक कितें करपाक जाय ते आमकां करचे पडटले, अशी शिटकावणी विजय हांणी दिल्या.
परिस्थिती नियंत्रणा भायर वच्चे पयली तांच्यो मागण्यो मान्य करच्यो म्हण हांव विनवणी करता. तशेंच मुख्यमंत्र्यांनी आपल्याक पडून गेल्ले ना म्हूण सांगचें न्हय, अशें तांणी म्हणलें.
ह्या मनश्यांनी तुमका वयर काडला हेच मनीस तुमकां खंय पावोपाक जाय थंय पावोपाक शकतात, अशो थोमणो सरदेसाय हांणी सरकाराक मारला.
आमचे पुराय फाटबळ गोंयच्या टॅक्सीकारांक आसा. हांव देशा भायर आसा, देखून आमी पक्षाचे दिपक कळंगुटकार हांकां आंदोलनांत वांटेकार जावपाक सांगलां, अशें विजय सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
