भांगरभूंय | प्रतिनिधी
मुख्यमंत्रीः पुराय सुवाळ्याचेर 400 कोटी मोडटले
भांगरभूंय । प्रतिनिधी
पणजीः दरेकी 10 वर्सांनी जावपी सेंट फ्रान्सीस झेवियर अवशेश दर्शन सुवाळो अंदूं 21 नोव्हेंबर 2024 ते 4 जानेवारी 2025 मेरेन जातलो. हो सुवाळो संवसारीक महोत्सव थारतलो. सुवाळ्याचेर 400 कोटी मेरेन खर्च जातलो, अशी म्हायती मुख्यमंत्री डॉ. प्रमोद सावंत हांणी दिल्या. सुवाळ्या खातीर पोपसायबांक आमंत्रण दिलां, अशें तांणी सांगलें. अवशेश दर्शन सुवाळ्या खातीर स्थापन केल्या उंचेल्या पांवड्या वयले समितीची शुक्रारा पर्वरी मंत्रालयांत बसका जाली. बसके उपरांत पत्रकार परिशदेंत मुख्यमंत्री डॉ. प्रमोद सावंत हांणी अवशेश दर्शन सुवाळ्याची म्हायती दिली. येरादारी मंत्री मॉवीन गुदिन्हो, पर्यावरण मंत्री आलेक्स सिक्वेरा, आमदार राजेश फळदेसाय, फादर हॅन्रीक पिंटो, फादर लॉरेन्स आनी हेर वांगडी बसकेक हाजीर आशिल्ले.
21 नोव्हेंबराक नोवेना सुरू जातलीं. 3 डिसेंबराक फेस्त आसतलें. सुवाळ्या खातीर खासा संकेतथळ सुरू जातलें. भाविकांक संकेतथळाचेर नोंदणी करची पडटली. येरादारी वेवस्था, पार्कींग, पियेवपा खातीर उदक, रस्ते, सुरक्षा वेवस्था हांचो नियाळ बसकेंत घेतलो. मुळाव्या सुविधांचेर 200 कोटी रुपया खर्च जातले. पुराय सुवाळ्याचो खर्च 400 कोटीं मेरेन पावतलो, असो अदमास मुख्यमंत्र्यांनी उक्तायलो.
ज्येश्ठ नागरिकां खातीर आसतली स्वतंत्र वेवस्था
हाचे पयलीं 2004 आनी 2014 त अवशेश दर्शन सुवाळो जाल्लो. त्या वेळार लेलगीत भाजप सरकार सत्तेर आशिल्लें. ह्या वेळार अवशेश दर्शन सुवाळ्या पयलीं चिंबल जंक्शना वयल्या बायपास रस्त्याची दुसरी बाजू उक्ती जातली. 2014 त पोरणें गोंयचो बायपास रस्तो सुरू जाल्लो, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
