भांगरभूंय | प्रतिनिधी
पुराय सुवाळ्याचेर 400 कोटी रूपया जातलो खर्च
पणजी, प्रतिनिधी : दरेकी 10 वर्सांनी जावपी सेंट फ्रान्सीस झेवियर अवशेश दर्शन सुवाळो अंदू 21 नोव्हेंबर 2024 ते 4 जानेवारी 2025 मेरेन जातलो. हो सुवाळो संवसारीक महोत्सव थारतलो. सुवाळ्याचेर 400 कोटी मेरेन खर्च जातलो, अशी म्हायती मुख्यमंत्री डॉ. प्रमोद सावंत हांणी दिल्या. सुवाळ्या खातीर पोपसायबांक आमंत्रण दिलां, अशें तांणी सांगलें.
अवशेश दर्शन सुवाळ्या खातीर स्थापन केल्या उचेल्या पांवड्यावेल्या समितीची आयज पर्वरी मंत्रालयात बसका जाली. बसके उपरांत पत्रकार परिशदेत मुख्यमंत्री डॉ. प्रमोद सावंत हांणी अवशेश दर्शन सुवाळ्याची म्हायती दिली. येरादारी मंत्री मॉवीन गुदिन्हो, पर्यावरण मंत्री आलेक्स सिक्वेरा,आमदार राजेश फळदेसाय, फादर हेनरिक पिंटो, फादर लॉरेन्स आनी हेर वांगडी बसकेक हाजीर आशिल्ले.
21 नोव्हेंबराक नोवेना सुरू जातल्यो. 3 डिसेंबराक फेस्त आसतले. सुवाळ्या खातीर खासा संकेतथळ सुरू जातले. भाविकांक संकेतथळाचेर नोंदणी करची पडटली. येरादारी वेवस्था, पार्किंग, पियेवपा खातीर उदक, रस्ते, सुरक्षा वेवस्था हांचो नियाळ बसकेत घेतलो. मुळाव्या सुविधांचेर 200 कोटी रूपया खर्च जातलो. पुराय सुवाळ्याचो खर्च 400 कोटीं मेरेन पावतलो, असो अदमास मुख्यमंत्र्यांनी उक्तायलो. ज्येश्ठ नागरिकां खातीर स्वतंत्र वेवस्था आसतली.
हाचे पयलीं 2004 आनी 2014 वर्सा अवशेश दर्शन सुवाळो जाल्लो. ते वेळार सुद्दा भाजप सरकार सत्तेर आशिल्ले. हे वेळार अवशेश दर्शन सुवाळ्या पयली चिंबल जंक्शनावेल्या बायपास रस्त्याची दुसरी बाजू उक्ती जातली. 2014 वर्सा पोरणें गोंयचो बायपास रस्तो सुरू जाल्लो, अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
