भांगरभूंय | प्रतिनिधी
गॅबोरोन, खबरां संस्था ः संवसारांतलो दुसरो व्हडलो हिरो बोत्स्वानांत सांपडला. बीबीसीच्या अहवाला प्रमाण कॅनेडियन फर्म लुकारा डायमंडाच्या कैरोच्या खणींत 2492 कॅरेटाचो हिरो सांपडला. 1905 वर्सा दक्षीण आफ्रिकेंत सांपडिल्ल्या 3106 कॅरेट वजनाच्या कलिनन हिऱ्या उपरांत हो सगळ्यांत व्हडलो हिरो.
कैरो खण बोत्स्वानाची राजधानी गॅबोरोन पसून सुमार 500 किमी अंतराचेर आसा. हाचे आदीं 2019 वर्सा हेच खणींत 1758 कॅरेटाचो सावेलो हिरो सांपडिल्लो. तो लुई व्हिटॉन हे फ्रेंच फॅशन कंपनीन विकतो घेतिल्लो.
हाचे आदीं 2017 वर्सा बोत्स्वानाच्या कैरो खणींत मेळिल्लो 1111 कॅरेट लेसेडी ला रोना हिरो ब्रिटीश ज्वेलरान 444 कोटी रुपयांक विकतो घेतिल्लो. संवसारांतलो बोत्स्वाना हो हिऱ्यांचे व्हड उत्पादन करपी देश. संवसारांतले 20% हिरे हांगाच तयार जातात.
लुकारा डायमंड फर्माचे मुखेली विल्यम लॅम्ब हांणी सांगलें, “ह्या सोदाक लागून आमकां खोशी जाल्या. आमचे मेगा डायमंड रिकव्हरी एक्स-रे तंत्रज्ञान वापरून हो हिरो सोदून काडला.
हिरो म्हणल्यार कितें, तो कसो तयार करतात?
धर्तरेच्या पृश्ठ भागासावन सुमार 160 किलोमीटर सकयल ‘किम्बरलाइट पायप’ नांवाचो एक खाशेलो खडप मेळटा. धर्तरेंतल्या खोल फटींतल्यान मॅग्मा व्हांवता आनी एकाच सुवातेर जमता तेन्ना ‘किम्बरलाइट पायप’ तयार जाता.
धर्तरेभितरल्या सामक्या चड दाबाक लागून आनी तापमानाक लागून कार्बन क्रिस्टल्स ल्हव ल्हव हिऱ्यांत रुपांतरीत जातात. अशें म्हण्टात की हिरो शंबर टक्के कार्बनापसून तयार जाता, जर तो ओव्हनांत 763 अंश सेल्सियस तापमानांत तापयल्यार हो हिरो, संवसारांतलो सगळ्यांत बळिश्ट पदार्थ, जळून कार्बन डाय-ऑक्सायड वायूंत रुपांतरीत जाता. आयदनांत हिऱ्याचो गोबर उरना.
इंटरनॅशनल इन्स्टिट्यूट ऑफ जेमोलॉजीच्या मतान सैमीक हिरो 99.95% कार्बनापसून तयार जाता, जाल्यार तातूंत 0.05% हेर पदार्थ आसतात. हें उणे आसूं शतात, पूण ताका लागून हिऱ्याची चमक आनी आकार वाडोवंक वा उणो करूं येता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
