भांगरभूंय | प्रतिनिधी
नेटान विकसीत जावपी संवसारांत डिजिटल तंत्रगिन्यान वेगवेगळ्या मळार नवनिर्माण आनी उदरगतीचो आदारस्तंभ जालां. तरणाट्यांनी ताचो फायदो घेवपाक जाय.
तंत्रगिन्यानाक लागून संवसारांत खूब प्रगती जाल्या आनी तें संवसारांक व्हडा वेगान बदलत आसा. तंत्रगिन्यानाच्या माध्यमांतल्यान संवसारांत जायत्यो गजाली सुदारूं येतात, पूण तंत्रगिन्यान आनी तरणाटेपण हांचो मेळ बदलाचें प्रतीक जावंक शकता. आयची तरणाटी पिळगी पुरायपणान तंत्रगिन्यानांत गुंतल्या, जी ते वेगवेगळ्या मळारय वापरता.
गोंयांतल्यो चडशो शिक्षणीक संस्थाय प्रगत तंत्रगिन्यानाचेर वळून विद्यार्थ्यांक तेंच शिकयतात, देखीक गोंय इन्स्टिट्यूट ऑफ मॅनेजमेंटाच्या विद्यार्थ्यांनी पायथन प्रोग्रामिंग साधनाचो वापर करून डिजिटल कार्बन फुटप्रिंट कॅल्क्युलेटर तयार केला. उर्जेचो वापर, येरादारी प्रदुशण आनी तुमचे जिणे पद्दतीच्या निवडीचेर आदारीत हरितगृह वायूच्या उत्सर्जन हे साधन मेजता.
जीआयएम हें विद्यार्थ्यांची तंत्रगिन्यानाची कुशळटाय वाडोवपाचेर सतत लक्ष केंद्रीत करता. ह्या कुशळटाये वरवीं विद्यार्थी संवसारांत टिकावू उदरगत हाडूंक शकतात. गोवा इन्स्टिट्यूटांतले विद्यार्थी संस्थेच्या टिकावू उदरगतीच्या ध्येयां प्रमाण अर्थपूर्ण उपाय सोदपा खातीर तंत्रगिन्यानाचो वापर करपाक शिकतात. डिजिटल कार्बन फुटप्रिंट कॅल्क्युलेटर सोदून समाजांत अर्थपूर्ण बदल घडोवन हाडपाक विद्यार्थ्यांक सशक्त करता, अशें जीआयएम सेंटर फॉर सोशल सेंसिटिव्हिटी अँड ऍक्शनची अध्यक्ष डॉ. दिव्या सिंघल हांणी सांगलें.
एआय आनी तंत्रगिन्यानाचो उपेग जायत्या वेवसायीक क्षेत्रांनी सुरू आसा. वेवसायीक रितीन संबंदीत अपडेट रावपा खातीर डिजिटल कुशळटाय मेळोवपाची बेगोबेग गरज आसा. सध्या दर्यादेगेवेल्या बचाव कार्यांतय ह्या तंत्रज्ञानाचो उपेग करतात. औरास आनी ट्रायटन हीं दोन तंत्रगिन्यानाचीं वाहनां सध्या दृष्टी जीवरक्षक दळा वतीन गोंयच्या दर्यादेगांचेर गस्त घालतात. ते पर्यटकांक सुरक्षेच्यो सुचोवण्यो दितात, जाका लागून लायफगार्डांक खूब फायदो जाता. अशे तरेन अशा साधनांचें गिन्यान वा तीं हाताळपाची कुशळटाय मेळ्ळ्यार नवे नोकरेची संद मेळटा. केंद्र आनी राज्य दोनूय सरकारां रोजगारा खातीर कुशळटाय म्हत्वाचीं मानतात. ह्या डिजिटल आदारीत संवसारांत डिजिटल मार्केटिंग प्रशिक्षण म्हत्वाचें, खास करून समाजीक-प्रधान प्रकल्पां खातीर.
लायफगार्डिंगांत एआयचो आस्पाव केल्यार जोखीम वेवस्थापन करपाक मदत जाता आनी आमच्या मनीस संसाधनांची कार्यक्षमताय वाडटा. एआय आदारीत प्रणाली, ऑरास आनी ट्रायटन, नो-स्विम झोनांचेर नियंत्रण दवरतात, जोखीम सोदून काडटात आनी ड्यूटीचेर आशिल्ल्या लायफगार्डांक म्हायती दितात, जाका लागून तांकां मजत करपाक मेळटा, अशें दृष्टी मरिनाचे सीईओ नवीन अवस्थी हांणी सांगलें.
आयच्या डिजिटल युगांत जायत्यो गजाली साक्षी जाल्यात. ‘ह्यो डिजिटल प्लॅटफॉर्म विंगड विंगड प्रेक्षकां मेरेन पावपाक आनी तांकां प्रेरणा दिवपाक अपूर्व संद दितात. देखीक, डिजिटल मार्केटिंग कुशळटाय तरणाट्यांक आकर्शक घडणुको तयार करपाक सक्षम करता. सोशल मिडिया वरवीं आमी जायत्यो घडणुको सांगूंक शकतात, जागृताय मोहीम करूंक शकतात आनी झाडां रोवपाच्या उपक्रमां खातीर स्वयंसेवकांक एकठांय हाडूंक शकतात.’ अशें तरणाट्यांक डिजिटल रितीन कुशळटाय दिवपी पर्वरेची प्रशिक्षण संघटना बुटकॅम्पांतली प्रशिक्षक साविओला डायस हांणी सांगलें.
दर्यादेगेवेल्या सुरक्षेच्या आनी तंत्रगिन्याना संबंदीत शिक्षणांतल्या प्रगती भायर डिजिटल नवनिर्माणाचो पाककलेच्या आनी हॉस्पिटॅलिटी उद्देगांचेर म्हत्वाचो परिणाम जावपाक लागला. “तंत्रज्ञान हाताच्या कामांक उणें करून आनी डेटा विश्लेशण, सोशल मिडिया वेवस्थापन अशो नवी भुमिका तयार करून काम चड कार्यक्षम करता. आमी एक ई-लर्निंग मॉड्यूल तयार करतात जें विद्यार्थ्यांक ऑनलायन सामुग्री आनी चांचण्यो ऍक्सॅस करूंक दिता. तशेंच स्मार्ट ओव्हन सारकिल्या वाय-फाय सक्षम रांदचे कुडीच्या उपकरणांचेर डिजिटल नियंत्रण दवरूं येता, जाका लागून रांदचे कुडीचीं कामां सोंपीं जाता अशें कामाक्षी पाककला संस्थेचे संस्थापक परिक्षीत पै फोंडेकार हांणी सांगलें.
तंत्रगिन्यानाची उदरगत जायत वता तशी व्यापक डिजिटल प्रशिक्षणाची गरज चडांत चड म्हत्वाची जाता. टिकावू आसूं, जिवीत वांचोवपी आसूं वा आतिथ्य आसूं, डिजिटल जगांत जुळोवन घेवपाची आनी फुलपाची तांक आयच्या तरणाट्यांचो फुडार थारायतली. हे प्रगतीक वेंग मारुन ते नोकरेचे बाजारपेठे खातीर स्वताक तयार करतातूच, पूण चड टिकावू आनी तंत्रीक नदरेन फुडारिल्ल्या समाजांतूय योगदान दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
