भांगरभूंय | प्रतिनिधी
मंत्रीमंडळ फेरबदलाचे फाटभुंयेर बसका आनी घोशणांक ओतो
– मंत्री विश्वजीत राणे हांचे कडल्यान म्हत्वाच्यो घोशणा
– नव्यो येवजण्यो, नवे उपक्रम चालीक
भांगरभूंय । प्रतिनिधी
पणजी : विकसीत गोंया खातीर मंत्रीमंडळात बदल जावपाची गरज आसा आनी कांय दिसांनी तें जातलें, ह्या मुख्यमंत्र्यांच्या विधाना उपरांत गोंयांतले सगळे मंत्री सक्रीय जाल्यात. भलायकी मंत्री विश्वजीत राणे हांचे सयत हेर मंत्र्यांनी बसका तशेंच घोशणांचो धडाको सुरू केला. हे फाटंभुयेर मंत्र्यांचे कामगिरीची मोलावणी जावन मंत्रीमंडळ फेरबदलाचो निर्णय जावपाक जाय, अशें विधान समाज कल्याण मंत्री सुभाष फळदेसाय हांणी केलां.
जुलयांत सुरू जाल्लें पावसाळी अधिवेशन ऑगस्टांत सोंपलें. निमाण्या वेळार नगरनियोजन मंत्री विश्वजीत राणे हांणी नगरनियोजन दुरुस्ती विधेयक फाटीं घेतलें. तशेंच उद्देगमंत्री मॉवीन गुदिन्हो हांणी सादर केल्लें आयपीबी दुरुस्ती विधेयक चिकित्सा समिती कडेन धाडचें पडलें. हाका लागून ह्या अधिवेशनांत सरकाराची नाचक्की जाली. नगरनियोजन दुरुस्ती विधेयकाक सरकार मदल्या मंत्र्यांनीच विरोध केल्ल्यान तें फाटीं घेवचें पडलें, अशी म्हायती गोपांनी दिली. अधिवेशना उपरांत मुख्यमंत्री डॉ. प्रमोद सावंत हांणी प्रुडंट मिडीयाक मॅराथोन मुलाखत दिली. विकसीत गोंया खातीर मंत्रीमंडळांत फेरबदल जावप गरजेचें आसा. बेगिनूच तो जातलो, अशें मुख्यमंत्र्यांनी मुलाखतींत सांगलें. हाचे उपरांत मंत्रीमंडळ फेरबदलाच्यो हालचाली भारतीय जनता पक्षांत सुरू जाल्यो. भाजप भवनाचो बुनियादी फातर बसोवपाचो सुवाळो शेनवारा 24 ऑगस्टाक जातलो. हे निमतान राष्ट्रीय अध्यक्ष जे. पी. नड्डा गोंयांत येतात. हाका लागून मंत्रीमंडळ फेरबदलाच्यो हालचाली नेटान चालू आसा.
मुख्यमंत्र्यांचे घोशणे उपरांत नगरनियोजन मंत्री विश्वजीत राणे खुबूच सक्रीय जाल्यात. नगरनियोजन मंडळा सयत गोंय वैजकी म्हाविद्यालया संबंदांत लेगीत तांणी बसका घेतल्यो. बेकायदा दोंगर कापणी केल्यार 25 लाख रुपयांचो तालांव घालपाची घोशणा तांणी केली. हाचे खातीर नगरनियोजन कायद्यांत दुरुस्तीचो प्रस्ताव आशिल्ल्याचें तांणी सांगलें. दक्षीण गोंय जिल्हो हॉस्पिटलांत खासगी वैजकी म्हाविद्यालयाचो प्रस्ताव रद्द जाल्ल्याचें तांणी सांगलें.
विश्वजीत राणे हांचे सयत कला आनी संस्कृती खात्याचे मंत्री गोविंद गावडे हे लेगीत खात्याच्यो बसका घेत आसात. बिरेस्तारा तांणी कलाकारांक कला वृद्दी पुरस्कार दिवपाची घोशणा केली. समाज कल्याण खात्याचे मंत्री सुभाष फळदेसाय हे लेगीत खात्याच्यो बसका घेवपांत व्यस्त आसात. एससी, एसटी विद्यार्थ्यां खातीरचे येवजणे विशीं जागृताय करपा खातीर तांणी पावलां उखलल्यांत. येवजणेच्या कार्यवाहीचो नियाळ घेवपा खातीर तांणी बसका घेतली.
पावसाळी अधिवेशना उपरांत खात्यांक अचकीत भेट दिवपा सयत मुख्यमंत्र्यांनी लेगीत बसका घेवपा सुरवात केल्या. आपत्ती वेवस्थापनाचेर बसका घेवन तांणी धोकादायक पालसाणींचो सोद घेवपाक अधिकाऱ्यांक सांगलें. दोंगर कापणेची म्हायती दिली ना, जाल्यार तलाठ्यांक जापसालदार धरपाची शिटकावणी तांणी दिली. रस्त्यांच्या फोंडकुलां खातीर तांणी भौशीक बांदकाम खात्याचे अभियंते तशेंच कंत्राटदारांक उजरावन काडले. मुख्यमंत्री सक्रीय जाता, तोच मंत्र्यांनी बसकांचो नेट धरला. वीजमंत्री सुदिन ढवळीकार हांणी वीज खात्या खातीर नव्यो क्रेनी तशेंच एअर लिफ्ट गाडयो मेळोवन दिल्यो. नुस्तेमारी खात्याचे मंत्री निळकंठ हळर्णकार हांणी सवाय नुस्तें विकपी रिक्षा येवजणेचो शुभारंभ केलो.
एके वटेन मंत्रीमंडळ फेरबदलाच्यो हालचाली सुरू आसात जाल्यार दुसरे वटेन सगळे मंत्री कामाक लागल्यात.
मंत्र्यांच्या कामाची मोलावणी जावपाक जाय : सुभाष फळदेसाय
कोणाक मंत्री करप वा मंत्रीमंडळ फेरबदलाचो निर्णय हो मुख्यमंत्र्यांचो अधिकार आसा. मंत्र्याचे कामगिरीची मोलावणी जावपाक जाय. आपले कडेन जीं खातीं आसात, ताचेर आपूण समाधानी आसा, अशें समाज कल्याण खात्याचे मंत्री सुभाष फळदेसाय हांणी मंत्रीमंडळ फेरबदलाचेर उलयतना सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
