भांगरभूंय | प्रतिनिधी
टॅक्सीकारांची भुमिकाः आमदार, खासदाराचो तेंको
भांगरभूंय । प्रतिनिधी
पेडणें: मुख्यमंत्री डॉ. प्रमोद सावंत जे मेरेन ठोस आस्वासन दिना, आमच्यो मागण्यो पुराय जायनात ते मेरेन आमी फाटीं सरचे नात, अशी भुमिका टॅक्सीकारांनी घेतल्या.
जिखतले रे जिखतले अश्यो घोशणा दीत पेडणेंच्या टॅक्सी वेवसायिकांनी हजारांचे संख्येन पेडण्यां मोर्चो काडलो आनी उपजिल्होधिकारी कार्यालयाचेर धडक दिली. 22 ऑगस्टाक सकाळीं 10.30 वरांचेर श्री भगवती देवीक नाल्ल दवरून आनी गाराणें घालून मोपाच्या मनोहर आंतरराष्ट्रीय विमानतलाचेर पेडणेंच्या थळाव्या टॅक्सी वेवसायिकांचेर जावपी अन्याया आड आंदोलनाक सुरवात केली.
कावंटर, टोल, वाडीव पार्कींग शुल्क, गोवा मायल्स काडचो, अश्या कांय मागण्यां खातीर फाटल्या कितल्याश्याच म्हयन्यांच्यान पेडणेंच्या थळाव्या टॅक्सी वेवसायिकांचें आंदोलन चालू आसा. सरकारान आस्वासन दिवन उपरांत ती पुराय करूंक नाशिल्ल्यान टॅक्सीकारांनी आंदोलनाचो निर्णय घेतलो.
मजगतीं, मांद्रेंचे आमदार जीत आरोलकार, पेडणेंचे आमदार प्रवीण आर्लेकार हांणी टॅक्सीकारांक समजावपाचो यत्न केलो. पूण टॅक्सीकार आपले भुमिकेचेर ठाम रावले. दक्षीण गोंयचे खासदार कॅप्टन विरियातो फर्नांडीस, आमदार क्रूझ सिल्वा हांणी आंदोलकांची भेट घेवन तांकां तेंको उक्तायलो.
ह्या आंदोलनांत टॅक्सी वेवसायीक संघटणेचे अध्यक्ष चेतन कामत हांणी सरकाराचेर खर टिका करून सरकारान हो विशय तत्काळ सोडोवचो ना जाल्या आंदोलन आनीक खर करचें पडटलें, अशी शिटकावणी दिली.
शिवा वॉरियसराचे रामा वारंग, निखील महाले, योगेश गोवेकार, आनंद गांवकार हांणी ह्या वेळार सांगलें, आमी आमच्या न्याय हक्का खातीर लढो दितात. सरकारान गोवा मायल्साचो कावंटर तत्काळ थंयच्यान काडचो. सरकारान थळाव्यांक वेगळो कावंटर दिवचो. आमचें रोजगाराचें साधन झोमून घेवचें न्हय. आमदार प्रवीण आर्लेकार, आमदार क्रूझ सिल्वा, जीत आरोलकार, खासदार कॅप्टन विरियातो फर्नांडीस हांणी आमकां तेंको दिला. ते आमचे वांगडा आसात, अशें सांगून तांणी तांचे उपकार मानले.
आंदोलनांत मांद्रेचे आदले पंच अॅड. अमीत सावंत, काँग्रेसीचे उपाध्यक्ष सुनील कवठणकार, संजय बर्डे, समाज वावुरपी दीपेश नायक, रामा काणकोणकर, तारा केरकर, शंकर पोळजी, टॅक्सी संघटणेचे पदाधिकारी बाप्पा कोरगांवकार, मिशन फॉर लोकलचे राजन कोरगांवकार, हांचे सयत विवीध पंचायतींचे सरपंच आनी विविध मळा वयले फुडाऱ्यांनी वांटो घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
