भांगरभूंय | प्रतिनिधी
कोलवाळ बंदखणींत विवीध उपक्रम
भांगरभूंय । प्रतिनिधी
म्हापशें: कोलवाळ बंदखणींतल्या कैद्यांनी आपली कुशळटाय दाखोवन विवीध आकाराच्यो सुमार 100 गणेश मुर्ती तयार केल्यात. ह्यो मुर्ती आतां सर्वसामान्य लोकां खातीर विक्री खातीर उपलब्ध केल्यात. 1200 ते 3500 रुपयां मेरेन आकारा प्रमाण मुर्तींचो दर आसा.
मध्यवर्ती बंदखणींत कैद आशिल्ल्या कैद्यांक तांच्या वेळाचो बरो वापर करचे खातीर तशेंच तांचे सुटके उपरांत पोट भरपा खातीर मजत करपी कुशळटाय तांकां शिकोवपा खातीर बंदखण प्रशासना कडल्यान प्रवृत्त आनी उर्बा दितात.
बंदखणींतल्या विवीध विभागांत कैद्यांक सुदरावपा खातीर उपक्रम चालू आसात. तातूंत निर्माण जाल्ल्या उत्पादनांत खूब पटींनी वाड जाल्या. बंदखणीचे अधिक्षक शंकर गांवकार हांचे सयत सहाय्यक अधिक्षक भानुदास पेडणेंकार आनी हेर अधिकारी तशेंच कर्मचारी कैद्यांक सुदरचे खातीर उर्बा दितात. हाका लागून अंदूं कुमारकाम विभागा कडेन संलग्न आशिल्ल्या कैद्यांनी 100 परस अदीक नागाच्यो मुर्ती तयार केल्यो आनी त्यो पळयता पळयता खपल्यो. नाग मुर्तीच्या येसा उपरांत कैद्यांनी सुंदर गणेश मुर्ती तयार केल्यात. त्यो आतां विक्री खातीर दवरल्यात.
कैद्यांच्या 10- 12 जाणांच्या पंगडान खर मेहनत घेवन एक, देड, दोन आनी तीन फुटांच्यो विवीध गणेश मुर्ती तयार केल्यात. त्यो लोकांक पळोवपाक आनी खरेदी करचे खातीर उपलब्ध केल्यात.
ह्या उपक्रमांत गोंय हस्तकला म्हामंडळाचो आदार बंदखण प्रशासनाक मेळ्ळा. म्हामंडळा वतीन दोन म्हयने कलाकारांनी ह्या कारागीर कैद्यांक प्रशिक्षण दिलां. ह्यो मुर्ती विक्री खातीर दवरल्यात. इत्सुकांनी बुकींग करचे खातीर 9421418729, 9588601382, 9764363604 वा 9552583070 ह्या नंबराचेर संपर्क करचो, असो उलो बंदखण प्रशासना वतीन मारला.
बंदखण अधिक्षक शंकर गांवकार हांणी सांगलें, बंदखणींतले सगळेच लोक वायट आसतात, अशी लोकांची चुकीचो समज आसा. कैंद्यांक बंदखणींत दवरून तांचे मदीं सुदारणा घडोवन हाडप हें आमची मोख आसा. सुदारणा उपक्रमा खाला तांकां प्रेरणा आनी मजत मेळटा. बंदखणींतल्यान भायर सरले उपरांत ते बरे नागरीक जावन स्वावलंबी जावपाक शकतात. हालींच आमी कैद्यां खातीर कांय नवे उपक्रम चालीक लायल्यात. तातूंत सुरक्षेच्या दिश्टीकोनांतल्यान स्मार्ट कार्ड कॉलींग सुविधा, महिला कैद्यां खातीर फुलां तयार करप, मसालो दळप आनी हेर उपक्रमांचो आस्पाव आसा. अशे उपक्रम चालीक लायिल्ल्यान बंदखणींतलें वातावरण सकारात्मक उरता, अशें पेडणेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
