भांगरभूंय | प्रतिनिधी
वास्को, प्रतिनिधी : मुरगांव पालिकेच्या बालोद्यानाचे मेकळे सुवातेर जीसुडा वतीन स्ट्रीट फूड कोर्टा खातीर विकसीत केल्ले सुवातेची पावणी करपाक मुंबय उच्च न्यायालय, गोंयान स्थगिती दिल्या. हे विशीं जाप दिवपा खातीर मुरगांव नियोजन आनी विकास प्राधिकरण, मुरगांव पालिका, जीसुडा तशेंच हेर संबंदीत प्रतिवादींक दोन सप्तकांची मुजत दिल्या. समाजीक कार्यकर्ते नजीर खान हांणी ह्या जाग्यार स्ट्रीट फूड कोर्ट उबारपाक परवानगी दिवची न्हय अशी जनहीत याचिका दाखल केल्ली.
केंद्रीय भलायकी खात्यान नागरिकांक बरे खावपाचे जिन्नस मेळचे खातीर देशभरांतल्या १०० जिल्ह्यांनी १०० फूड स्ट्रिट कोर्ट विकसीत करपाची येवजण जाहीर केल्या. हे खातीर दरेका स्ट्रीट कोर्ट खातीर एक कोटी रुपयांचो निधी मंजुर केला. मुरगांव पालिकेन १४ ऑगस्ट २०२३ क जाल्ले बसकेंत वास्को रेल्वे स्टेशना मुखारची सुवात स्ट्रीट फूड उबारपा खातीर हस्तांतरीत करपाचो थाराव घेतिल्लो. मात थंय कांय आडखळी आशिल्ल्यान वास्को बालोद्याना लागसारची एक हजार चौखण मिटराची सुवात दितले, अशें स्पश्ट केल्लें. वास्को चडशे खाणां विक्री करपी रेल्वे स्टेशना लागसार आसात. मात हे वस्तुस्थिती कडेन आडनदर करून मुरगांव पालिकेन वास्को बालोद्यान लागसारची सुवात स्ट्रीट फूड कोर्ट करपाक दिली. उपरांत हो प्रकल्प जीसुडान हातांत घेतलो. फूड कोर्ट बांदपा खातीर निविदा काडली. ते प्रमाण थंय चिरे, कोटा स्टोन, मॅटलचें काम आशिल्ल्या बारा स्टॉल्सांचें बांदकाम केलें.
मात, नझीर खान हांणी ते सुवातेचें रुपांतर स्ट्रिट फूड कोर्टांत करपाक आव्हान दिवपी जनहीत याचिका दाखल केल्ली. तांणी ह्या बांदकामाक स्थगिती दिवपाची मागणी केल्ली. मात जंय फूड कोर्ट बांदता ती सुवात खेळपाचो ग्रावंड न्हय. ताचो वापर वेवसायीक कारणां खातीर करतात असो युक्तीवाद करून हे याचिकेक अधिकार्यांनी विरोध केल्लो. हे विशीं न्यायमूर्ती एम. एस. कर्णिक आनी न्यायमूर्ती वाल्मिकी मिनेझीस हांणी दोनूय बाजू आयकून घेतल्यो. नझीर खान वतीन ऍड. भार्गव खांडेपारकार, ऍड प्रितीश माजाळकार हांणी बाजू मांडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
