पाकिस्तानाच्या सर्वोच्च न्यायालयाचेर हल्लो: देवाची निंदा करप्याक सोडिल्ल्यान लोक तिडकले

भांगरभूंय | प्रतिनिधी

इस्लामाबाद, खबरां संस्था : पाकिस्तानाची राजधानी इस्लामाबादच्या सर्वोच्च न्यायालयाचेर शेंकड्यांनी कडव्या लोकांचे गर्देन हल्लो केलो. पाकिस्तानाचे मुखेल न्यायाधीश काझी फैज इसा हांणी देवाची निंदा करपा संबंदी दिल्ल्या निर्णयाचेर लोक तिडकले. धर्म हक्क कायद्या खाला तांणी एका अहमदिया पंथाच्या मनशाक देवाची निंदा केल्ल्या आरोपांतल्यान निरपराधी थारायलो. ताका लागून पाकिस्तानांतले कडवे धर्ममोगी लोक तिडकल्यात.
पाकिस्तानी खबरां पत्र ‘डॉन’चे खबरे प्रमाण, सर्वोच्च न्यायालयाच्या निर्णया आड आंदोलनाचे फुडारपण अलमी मजलिस तहफुज- ए- नबुवत करताले. जमात- ए- इस्लामी आनी जमीयत उलेमा- ए- इस्लामचे (जेयूआयएफ) फुडारी हातूंत तांकां फाटबळ दिताले. ते पाकिस्तानाच्या मुखेल न्यायाधीशांच्या राजीनाम्याची मागणी करताले. न्यायालयान आपलो निकाल बदलपाचीय मागणी तांणी केली.
हजारांनी आंदोलकांनी सुप्रीम कोर्टा भायलो सुरक्षा घेरो तोडलो. ते इमारती कडेन पावले. तांकां कोर्टांत वचपा पसून आडावपा खातीर पुलिसांनी लाठीचार्ज, धुंवर आनी उदक मारलें. आतां ह्या आंदोलनाचें नेतृत्व करपी अलमी मजलिस हे संघटणेन सर्वोच्च न्यायालयाक आपल्या निर्णयाचेर विचार करपा खातीर ७ सप्टेंबर मेरेन मुजत दिल्या.
जिओ टीव्ही प्रमाण, ६ फेब्रुवारी २०२४ दिसा सर्वोच्च न्यायालयाच्या इतिहासीक निर्णया वयल्यान हो वाद सुरू जालो. सुप्रीम कोर्टान अहमदिया पंथाचे मुबारक अहमद सानी हांची सुटका करपाचो आदेश दिल्लो. सानीक ७ जानेवारी २०२३ दिसा अटक केल्ली. २०१९ त एके कॉलेजींत ‘एफसीर-ए-सगीर’ वाचिल्ल्याचो आरोप ताचेर आशिल्लो.
फकीर- ए- सगीर हें अहमदिया समुदाया कडेन संबंदीत एक धर्मीक पुस्तक. हातूंत अहमदिया पंथाचे संस्थापकाचे पूत मिर्झा बशीर अहमद हांणी कुराणाचो तांचे तरेन अर्थ लायला. कुराण (मुद्रण आनी रेकॉर्डिंग) (सुधारणा) कायदो, २०२१ खाला सानी हांकां अटक केल्ली.
सानी हांणी न्यायालयांत युक्तिवाद केलो, ज्या कायद्या प्रमाण तांकां ख्यास्त जाता तो कायदो २०१९ त अस्तित्वांत नाशिल्लो. म्हणटकच ते तांच्या धर्मा कडेन संबंदीत पुस्तकाचो प्रचार करपाक मेकळे आशिल्ले. सर्वोच्च न्यायालयान सानी हांची याचिका मान्य करून तांची सुटका केली. ही घडणूक सोमारा घडली. मात ताचे परिणाम आयज दिसले.